ഹൈക്കോടതി ഉത്തരവ് ലംഘിച്ച് ഗുരുവായൂർ ക്ഷേത്രത്തിൽ റീൽസ് ചിത്രീകരിച്ച ജസ്ന സലിം കൈത്തണ്ട മുറിച്ച് ആത്മഹത്യയ്ക്ക് ശ്രമിച്ചു. ഇതിന്റെ വീഡിയോയും യുവതി സോഷ്യൽ മീഡിയയിൽ പങ്കുവച്ചു. ആളുകൾ എന്തിനാണ് എന്നെ ഇത്രയധികം വെറുക്കുന്നതെന്ന് ചോദിച്ചാണ് ചോരയൊലിക്കുന്ന കൈയുടെ ദൃശ്യങ്ങൾ ജസ്ന പങ്ക് വച്ചത്.ദൃശ്യങ്ങൾ പിന്നീട് നീക്കം ചെയ്തു.
തുടർന്ന് മുറിവ് കെട്ടിവച്ച കൈയുടെ ദൃശ്യം യൂട്യൂബിൽ ജസ്ന പങ്ക് വച്ചു . കൈയിലെ വേദന കാരണം ഉറങ്ങാൻ കഴിയുന്നില്ലെന്ന് പറഞ്ഞുകൊണ്ടായിരുന്നു പുതിയ വീഡിയോ . ‘ഞാൻ അകത്ത് പോയി കണ്ണനെ കാണും, എന്റെ വിവാഹവും ഇവിടെ നടക്കും’ എന്ന അടിക്കുറിപ്പോടെയാണ് വീഡിയോ പങ്കുവെച്ചത്.
പലരും വീഡിയോയെ വിമർശിച്ച് രൂക്ഷമായി കമന്റ് ചെയ്തിട്ടുണ്ട്. നിങ്ങൾ എത്ര തവണ ഈ ആത്മഹത്യാ നാടകം നടത്തും, ഇങ്ങനെ അഭിനയിക്കാൻ നിങ്ങൾക്ക് നാണമില്ലേ? എന്നിങ്ങനെയാണ് കമന്റുകൾ . ഹൈക്കോടതി ഉത്തരവ് ലംഘിച്ച് റീൽ ചിത്രീകരിച്ചതിന് ജസ്നയ്ക്കെതിരെ പോലീസ് നേരത്തെ കേസെടുത്തിരുന്നു. ക്ഷേത്രത്തിന്റെ പ്രവേശന കവാടത്തിൽ കേക്ക് മുറിച്ച് ജന്മദിനം ആഘോഷിച്ച് അത് സോഷ്യൽ മീഡിയയിൽ പ്രചരിപ്പിച്ചതിനാണ് ഹൈക്കോടതിയിൽ പരാതി ലഭിച്ചത്.
ഇതിനെത്തുടർന്ന്, ക്ഷേത്രത്തിൽ വീഡിയോ ചിത്രീകരണം കോടതി നിരോധിച്ചു. മതപരമായ ചടങ്ങുകളോ വിവാഹങ്ങളോ ഒഴികെയുള്ള എല്ലാ വീഡിയോ ചിത്രീകരണങ്ങളും കോടതി നിരോധിച്ചു. ആ ഉത്തരവ് ഉണ്ടായിരുന്നിട്ടും, ജസ്ന വീണ്ടും റീൽസ് ചിത്രീകരിച്ചതായി പരാതി ഉയർന്നിട്ടുണ്ട്.
