പത്തനംതിട്ട: ശബരിമലയിലെ സ്ട്രോംഗ് റൂമിൽ സൂക്ഷിച്ചിരുന്ന 55.72 പവൻ തൂക്കമുള്ള സ്വർണ്ണ കിരീടം കാണാതായതായി റിപ്പോർട്ട്. കേരള ഹൈക്കോടതിയുടെ നിർദ്ദേശപ്രകാരം തിരുവാഭരണങ്ങളുടെ കണക്കെടുപ്പ് നടത്തിയപ്പോഴാണ് സംഭവം പുറത്തറിഞ്ഞത്. 2012-ൽ തമിഴ്നാട്ടിലെ ഭക്തർ സമർപ്പിച്ചതായിരുന്നു ഈ സ്വർണ്ണ കിരീടം.
അതേ വലുപ്പത്തിലും രൂപകൽപ്പനയിലുമുള്ള മുക്കുപണ്ട കിരീടമാണ് നിലവിൽ സ്ട്രോംഗ് റൂമിലുള്ളത്. വജ്രം പോലെ തോന്നിക്കുന്ന വെള്ളക്കല്ലുകൾ പതിച്ചതാണ് ഈ കിരീടം. സമർപ്പിക്കപ്പെട്ട സമയത്ത് കിരീടത്തിന് 445.78 ഗ്രാം ഭാരമുണ്ടായിരുന്നു. എന്നാൽ, ഇപ്പോൾ അവിടെയുള്ള അനുകരണ കിരീടത്തിന് 240 ഗ്രാം ഭാരം മാത്രമേയുള്ളൂ.
ശബരിമലയിലെ സ്വർണ്ണം മോഷണം പോയ സംഭവത്തെത്തുടർന്ന്, ഹൈക്കോടതി അമിക്കസ് ക്യൂറി ജസ്റ്റിസ് കെ.ടി. ശങ്കരന്റെ നേതൃത്വത്തിൽ അവിടെയുള്ള വിലപിടിപ്പുള്ള വസ്തുക്കളുടെ കണക്കെടുപ്പ് ആരംഭിച്ചിരുന്നു. ഈ പരിശോധനയ്ക്കിടെയാണ് നിർണ്ണായകമായ വിവരങ്ങൾ പുറത്തുവന്നത്.
അതേസമയം സ്വർണ്ണക്കിരീടം മോഷണം പോയിട്ടില്ലെന്നാണ് തിരുവാഭരണക്കമ്മീഷണർ പറയുന്നത് . യഥാർത്ഥ സ്വർണക്കിരീടത്തിന് പുറമെ ഭക്തർ വഴിപാടായി നൽകിയ കൃത്രിമ അലങ്കാര കിരീടങ്ങളും സന്നിധാനത്തെ ഭണ്ഡാരപ്പുരയിൽ ഭദ്രമായി സൂക്ഷിച്ചിട്ടുണ്ടെന്നാണ് തിരുവാഭരണക്കമ്മീഷണർ വ്യക്തമാക്കിയിരിക്കുന്നത്.
