പത്തനംതിട്ട : ശബരിമല നട ഇന്ന് അടയ്ക്കുമെന്ന് വ്യാജപ്രചാരണം നടത്തിയ സംഭവത്തിനെതിരെ സൈബർ പോലീസിൽ പരാതി നൽകി ദേവസ്വം ബോർഡ് . സൂര്യഗ്രഹണം ആയതിനാൽ നട അടച്ചിടുമെന്നായിരുന്നു പ്രചാരണം . എന്നാൽ രണ്ട് വർഷം മുൻപുള്ള വാർത്തയാണ് ഇത്തരത്തിൽ പ്രചരിപ്പിക്കുന്നത് .സ്ഥാപിത താൽപ്പര്യക്കാരാണ് ഇത്തരത്തിൽ വാർത്തകൾ പ്രചരിപ്പിക്കുന്നതെന്ന് ദേവസ്വം ബോർഡ് ആരോപിച്ചു.
മണ്ഡല പൂജ ദിവസം എത്തുന്ന ആരെയും മടക്കി വിടില്ല . പരമാവധി ഭക്തർക്ക് ദർശന സൗകര്യം ഒരുക്കാനാണ് ദേവസ്വം ബോർഡിനും താല്പര്യം . കോടതിയും അതാണ് ആഗ്രഹിക്കുന്നത് .ഇത് വരെ ആരെയും തിരിച്ചു വിട്ടിട്ടില്ലെന്നും ദേവസ്വം ബോർഡ് വ്യക്തമാക്കി.
അതേസമയം ശബരിമലയിൽ ഈ വർഷം ഭക്തരുടെ എണ്ണത്തിൽ വർധനയുണ്ടായെന്നും ദേവസ്വം ബോര്ഡ് അറിയിച്ചു. ഭക്തരുടെ എണ്ണം തിങ്കളാഴ്ച മാത്രം ഒരുലക്ഷം കവിഞ്ഞിരുന്നു. 1,06,621 ഭക്തരാണ് തിങ്കളാഴ്ച ദർശനം നടത്തിയത്. സീസണിലെ റെക്കോഡ് തിരക്കാണിത്. സ്പോട്ട് ബുക്കിങ് വഴി 22,769 പേരും പുൽമേട് വഴി 5175 പേരുമാണ് എത്തിയത്.
