തിരുവനന്തപുരം ; ഡിവൈഎഫ്ഐ സംസ്ഥാന പ്രസിഡന്റ് ചിന്താ ജെറോമിന്റെ പിഎച്ച്ഡി പ്രബന്ധം പരിശോധിക്കാന് പ്രത്യേക സമിതി രൂപീകരിക്കാന് കേരള സര്വകലാശാല സിന്ഡിക്കറ്റ്. സിന്ഡിക്കറ്റ് അംഗം ആര്.എസ്. ശശികുമാര് വിസി ഡോ. മോഹനന് കുന്നുമ്മലിനു നല്കിയ പരാതിയുടെ അടിസ്ഥാനത്തിലാണ് നാലംഗ ഉപസമിതിയെ നിയോഗിക്കാന് ഇന്ന് ചേര്ന്ന സിന്ഡിക്കറ്റ് യോഗം തീരുമാനിച്ചത്.
പ്രബന്ധത്തില് വ്യാപകമായ തെറ്റുകള് ഉണ്ടെന്ന് ചൂണ്ടിക്കാട്ടി പരാതി ഗവര്ണര് സര്വകലാശാലയ്ക്ക് കൈമാറിയിട്ടും മേല് നടപടികള് സ്വീകരിച്ചിരുന്നില്ല .പ്രബന്ധത്തില് ക്രമക്കേടുള്ളതായി ബോധ്യപ്പെട്ടാല് പിഎച്ച്ഡി ബിരുദം സസ്പെന്ഡ് ചെയ്യണമെന്നും പരാതി ആവശ്യപ്പെട്ടിരുന്നു. മലയാള വാണിജ്യ സിനിമകളുടെ പ്രത്യയശാസ്ത്രത്തെ അധികരിച്ച് ചിന്താ ജെറോം തയ്യാറാക്കിയ പ്രബന്ധത്തിനാണ് കേരള സര്വകലാശാല പിഎച്ച്ഡി ബിരുദം നല്കിയത്. കേരള സര്വകലാശാല മുന് പിവിസി ഡോ. പി.പി. അജയകുമാറിന്റെ മാര്ഗനിര്ദേശത്തിലാണ് പ്രബന്ധം തയ്യാറാക്കിയത്.
