തിരുവനന്തപുരം: സിപിഎം തിരുവനന്തപുരം ജില്ലാ സെക്രട്ടറിയായി എ.എ. റഹീം എംപിയെ നിയമിച്ചു. നിലവിലെ ജില്ലാ സെക്രട്ടറി വി. ജോയിയെ വരാനിരിക്കുന്ന നിയമസഭാ തിരഞ്ഞെടുപ്പിൽ വർക്കലയിൽ നിന്ന് മത്സരിപ്പിക്കാൻ പാർട്ടി തീരുമാനിച്ചതിനെ തുടർന്നാണ് റഹീമിനെ ജില്ലാ സെക്രട്ടറിയാക്കാൻ തീരുമാനിച്ചത്.
സംസ്ഥാന സെക്രട്ടറി എം.വി. ഗോവിന്ദന്റെ സാന്നിധ്യത്തിൽ ഇന്ന് നടന്ന ജില്ലാ സെക്രട്ടേറിയറ്റ് യോഗത്തിലാണ് റഹീമിന് താൽക്കാലിക ചുമതല നൽകാൻ തീരുമാനിച്ചത്. മാർച്ച് 6 ന് നടക്കുന്ന ജില്ലാ കമ്മിറ്റി യോഗത്തിൽ ഇത് സംബന്ധിച്ച ഔദ്യോഗിക പ്രഖ്യാപനം ഉണ്ടാകും. ജില്ലയിലെ എല്ലാ സിറ്റിംഗ് സി.പി.എം. എം.എൽ.എമാർക്കും വീണ്ടും അവസരം നൽകാൻ പാർട്ടി തീരുമാനിച്ചിരിക്കുകയാണ്. സംസ്ഥാന സെക്രട്ടേറിയറ്റ് യോഗം ഇത് അംഗീകരിച്ചിരുന്നു.
എന്നാൽ, ജോയിയുടെ സ്ഥാനാർത്ഥിത്വത്തെക്കുറിച്ച് മാത്രം അനിശ്ചിതത്വം തുടർന്നു. ശക്തമായ ഭരണവിരുദ്ധ വികാരം നിലനിൽക്കുന്നതിനാൽ മണ്ഡലം നിലനിർത്താൻ ജോയിക്ക് മാത്രമേ കഴിയൂ എന്നാണ് ജില്ലാ കമ്മിറ്റിയുടെ വിലയിരുത്തൽ. നിയമസഭാ തെരഞ്ഞെടുപ്പിൽ ഹാട്രിക് വിജയം നേടണമെങ്കിൽ തിരുവനന്തപുരം ജില്ലയിൽ വിജയം അനിവാര്യമാണ്. വിജയസാധ്യത കണക്കിലെടുത്ത് സംസ്ഥാന സെക്രട്ടേറിയറ്റ് ജോയിയെ വർക്കലയിൽ നിയോഗിച്ചു. ജോയിയുടെ ജനപ്രീതിയും മികച്ച ട്രാക്ക് റെക്കോർഡും കണക്കിലെടുക്കുമ്പോൾ, നേതൃത്വം വിജയത്തിൽ കുറഞ്ഞതൊന്നും പ്രതീക്ഷിക്കുന്നില്ല.
എൽഡിഎഫിന് മൂന്നാം തവണയും അധികാരത്തിലെത്തിയാൽ വി ജോയിയെ മന്ത്രിയാക്കുമെന്ന് ഉറപ്പാണ്. ജോയ് മത്സരിച്ചാൽ വാമനപുരം എംഎൽഎ ഡികെ മുരളിക്ക് ജില്ലാ സെക്രട്ടറി സ്ഥാനം നൽകുമെന്ന് റിപ്പോർട്ടുകൾ ഉണ്ടായിരുന്നു.
