ന്യൂഡൽഹി: പാർട്ടി നേതൃത്വം നേരിട്ട് ആവശ്യപ്പെട്ടിട്ടും, ഓപ്പറേഷൻ സിന്ദൂരിനെക്കുറിച്ചുള്ള ലോക്സഭാ ചർച്ചയിൽ പങ്കെടുക്കുന്നതിൽ വിസമ്മതിച്ച് കോൺഗ്രസ് എംപി ശശി തരൂർ നിന്ന് . പ്രതിപക്ഷ നേതാവ് രാഹുൽ ഗാന്ധിയുടെ നിർദ്ദേശപ്രകാരം തന്നെ സമീപിച്ച കോൺഗ്രസ് ഉപനേതാവ് ഗൗരവ് ഗൊഗോയിയോട് സംസാരിക്കാൻ തരൂർ വിസമ്മതം പ്രകടിപ്പിച്ചതായാണ് റിപ്പോർട്ട് .
പഹൽഗാം ഭീകരാക്രമണത്തിനു തിരിച്ചടി നൽകിയ ഓപ്പറേഷൻ സിന്ദൂരിനെക്കുറിച്ചുള്ള തരൂരിന്റെ പരാമർശത്തെച്ചൊല്ലിയുള്ള വിവാദങ്ങൾ തുടരുന്നതിനിടെയാണ് ഈ നീക്കം. ഭരണ, പ്രതിപക്ഷ ക്യാമ്പുകളിലെ അംഗങ്ങൾ ഉൾപ്പെട്ട വിദേശ പ്രതിനിധി സംഘ പര്യടനത്തിനിടെ, പ്രധാനമന്ത്രി നരേന്ദ്ര മോദി സാഹചര്യം കൈകാര്യം ചെയ്തതിനെ തരൂർ പ്രശംസിച്ചിരുന്നു, ഇത് കോൺഗ്രസിനുള്ളിൽ വിമർശനത്തിന് കാരണമായി.
ആ പരാമർശങ്ങളെ തുടർന്ന് നിരവധി നേതാക്കൾ അദ്ദേഹത്തിന്റെ പാർട്ടിയോടുള്ള വിശ്വസ്തതയെ ചോദ്യം ചെയ്തതായി റിപ്പോർട്ടുണ്ട്. കോൺഗ്രസ് സർവകക്ഷി സംഘത്തിലേക്ക് മറ്റ് എംപിമാരെ നാമനിർദ്ദേശം ചെയ്തിരുന്നെങ്കിലും, അമേരിക്ക, പനാമ, ഗയാന, ബ്രസീൽ, കൊളംബിയ എന്നിവിടങ്ങളിലേക്കുള്ള സന്ദർശനങ്ങൾക്ക് നേതൃത്വം നൽകാൻ സർക്കാർ തരൂരിനെ തിരഞ്ഞെടുക്കുകയായിരുന്നു .
സർക്കാരിന്റെ നടപടികളെ പിന്തുണയ്ക്കുന്ന അദ്ദേഹത്തിന്റെ പരാമർശങ്ങൾ ആഭ്യന്തര വിള്ളലുകൾക്ക് കാരണമായതായി പറയപ്പെടുന്നു, ചില സഹപ്രവർത്തകർ അദ്ദേഹം പാർട്ടിയുടെ “ലക്ഷ്മണ രേഖ” ലംഘിച്ച് ഔദ്യോഗിക നിലപാടിൽ നിന്ന് വ്യതിചലിച്ചുവെന്ന് ആരോപിച്ചു. ഓപ്പറേഷൻ സിന്ദൂരിനെയും പഹൽഗാം ആക്രമണത്തെയും കുറിച്ചുള്ള ചർച്ചകൾ ഇന്ന് പാർലമെന്റിൽ ആരംഭിച്ചു, ഭരണകക്ഷിയായ എൻഡിഎയിലെയും പ്രതിപക്ഷ ഇന്ത്യാ ബ്ലോക്കിലെയും മുതിർന്ന നേതാക്കൾ ചർച്ചയിൽ പങ്കെടുത്തു.
