കാണ്ഡഹാർ വിമാനറാഞ്ചലിന്റെ മുഖ്യസൂത്രധാരൻ റൗഫ് അസ്ഹർ ഓപ്പറേഷൻ സിന്ദൂറിൽ കൊല്ലപ്പെട്ടു. ജയ്ഷെ മുഹമ്മദ് തലവൻ മസൂദ് അസ്ഹറിന്റെ സഹോദരനാണ് അബ്ദുൽ റൗഫ് അസ്ഹർ.
മിസൈൽ ആക്രമണത്തിലാണ് റൗഫ് അസ്ഹറിന് പരിക്കേറ്റത്. ആക്രമണത്തിൽ പരിക്കേറ്റ ഇയാൾ പാകിസ്താനിലെ സൈനിക ആശുപത്രിയിൽ ചികിത്സയിലിരിക്കെയാണ് മരിച്ചത്. മസൂദ് അസ്ഹർ സ്ഥാപിച്ച ഭീകര സംഘടനയായ ജെയ്ഷ്-ഇ-മുഹമ്മദിന്റെ പരമോന്നത കമാൻഡറായിരുന്നു റൗഫ് . ജമ്മു കശ്മീരിലെ ഭീകര പ്രവർത്തനങ്ങളിൽ പങ്കുള്ളതിനാൽ ഇന്ത്യ തേടുന്ന ഭീകരരിൽ ഒരാളായിരുന്നു റൗഫ് .പാകിസ്ഥാനിലെ ബഹവൽപൂരിലെ ജെയ്ഷ്-ഇ-മൊഹമ്മദിന്റെ ആസ്ഥാനത്ത് ഇന്ത്യ നടത്തിയ ആക്രമണത്തിൽ മസൂദ് അസ്ഹറിന്റെ 10 കുടുംബാംഗങ്ങൾ കൊല്ലപ്പെട്ടു
1999 ൽ ഇന്ത്യൻ എയർലൈൻസ് വിമാനം ഐസി-814 ഹൈജാക്ക് ചെയ്തതിന്റെ സൂത്രധാരൻ റൗഫ് അസ്ഹറായിരുന്നു. വെറും 24 വയസ്സുള്ളപ്പോഴായിരുന്നു ഇത് . ഒടുവിൽ ഇത് മൂത്ത സഹോദരനും ജെയ്ഷ്-ഇ.എം സ്ഥാപകനുമായ മൗലാന മസൂദ് അസ്ഹറിനെ മോചിപ്പിക്കുന്നതിലേക്ക് നയിച്ചു. അതിനുശേഷം, 2001 ൽ ജമ്മു കശ്മീർ നിയമസഭയിലും ഇന്ത്യൻ പാർലമെന്റിലും നടന്ന ആക്രമണം, 2016 ലെ പത്താൻകോട്ട് വ്യോമതാവള ആക്രമണം, നഗ്രോട്ടയിലെയും കത്വയിലെയും സൈനിക ക്യാമ്പുകൾക്ക് നേരെയുള്ള ആക്രമണം എന്നിവയുൾപ്പെടെ ഇന്ത്യയിൽ ഗ്രൂപ്പ് നടത്തിയ എല്ലാ പ്രധാന ആക്രമണങ്ങളുടെയും പിന്നിൽ ഇയാളാണ്. 2019-ൽ 40 സിആർപിഎഫ് ജവാന്മാരുടെ മരണത്തിനിടയാക്കിയ പുൽവാമ ചാവേർ ബോംബാക്രമണത്തിലും ഇയാൾക്ക് ബന്ധമുണ്ട്.
