മുംബൈ : രൺബീർ കപൂർ, യാഷ്, സായ് പല്ലവി തുടങ്ങിയവർ അഭിനയിക്കുന്ന ‘രാമായണം’ എന്ന ചിത്രത്തിൽ ആരാധകർക്ക് വലിയ പ്രതീക്ഷകളുണ്ട്. 2026 ദീപാവലിക്ക് ചിത്രം റിലീസ് ചെയ്യും. സിനിമയുടെ ഷൂട്ടിംഗ് തകൃതിയായി പുരോഗമിക്കുകയാണ്. രാവണന്റെ വേഷത്തിന് യാഷ് കൂടുതൽ അനുയോജ്യനാണെന്ന് പലരും പറഞ്ഞിരുന്നു. എന്നാൽ, ഇപ്പോൾ രാമന്റെ വേഷത്തിന് രൺബീർ അനുയോജ്യനല്ല എന്ന അഭിപ്രായവും ഉയർന്നിരിക്കുകയാണ്. രൺബീർ കപൂറിന്റെ ഒരു പഴയ വീഡിയോയാണ് ഇതിന് ആധാരം .
അതിൽ രൺബീർ തന്റെ ഭക്ഷണക്രമത്തെക്കുറിച്ചും പ്രിയപ്പെട്ട ഭക്ഷണത്തെക്കുറിച്ചും പറയുന്നു. തനിക്ക് ഏറ്റവും ഇഷ്ടം ബീഫാണെന്നും രൺബീർ പറഞ്ഞിരുന്നു. ഇതാണ് വിമർശനങ്ങൾക്ക് കാരണമായിരിക്കുന്നത് . നേരത്തെ കങ്കണ റണാവത്തും ഇതിനെ എതിർത്തിരുന്നു.
‘രാമായണം’ എന്ന സിനിമയുടെ ചിത്രീകരണത്തിനായി രൺബീർ കപൂർ മാംസാഹാരം ഉപേക്ഷിച്ചതായും റിപ്പോർട്ടുകളുണ്ട്. കൂടാതെ, മദ്യപാനവും അദ്ദേഹം പൂർണ്ണമായും ഉപേക്ഷിച്ചു. ‘രാമായണം’ എന്ന ചിത്രം വലിയ ബജറ്റിലാണ് നിർമ്മിക്കുന്നത്. ഈ ചിത്രത്തിന്റെ ബജറ്റ് ആയിരം കോടി രൂപയാണെന്ന് പറയപ്പെടുന്നു.
രണ്ട് ഭാഗങ്ങളുടെയും ചിത്രീകരണം ഒരേസമയം നടക്കുകയാണ് . ചിത്രത്തിന്റെ ആദ്യ ഭാഗം 2026 ൽ പുറത്തിറങ്ങുമ്പോൾ, രണ്ടാം ഭാഗം 2027 ൽ പ്രദർശനത്തിനെത്തുമെന്ന് പ്രതീക്ഷിക്കുന്നു. ഇതിനുപുറമെ, രൺബീർ കപൂർ ‘ലവ് ആൻഡ് വാർ’ എന്ന പേരിലും സിനിമ ചെയ്യുന്നുണ്ട്. ആലിയ ഭട്ടാണ് ഈ ചിത്രത്തിലെ നായിക. സഞ്ജയ് ലീല ബൻസാലിയാണ് ഈ ചിത്രം സംവിധാനം ചെയ്യുന്നത്.
