ആദിപരാശക്തിയുടെ ഒൻപത് ഭാവങ്ങളെ ഒൻപതു ദിവസങ്ങളായി ആരാധിക്കുവാനുള്ള വേളയാണ് നവരാത്രിക്കാലം. ദേവീ ഉപാസനയ്ക്കും ദേവീ പ്രീതിക്കുമുള്ള ഉത്തമ മാർഗ്ഗമാണ് നവരാത്രി വ്രതം. പൊതുവെ നവരാത്രി കാലത്ത് ആദ്യ മൂന്നു ദിനം പാർവതീ ദേവിക്കും അടുത്ത മൂന്നു ദിനം ലക്ഷ്മീദേവിക്കും അവസാന മൂന്നു ദിനം സരസ്വതീദേവിക്കും പ്രാധാന്യം നൽകിവരുന്നു. ദുർഗ്ഗാഷ്ടമി നാളിൽ ദുർഗ്ഗ ആയും മഹാനവമി ദിനത്തിൽ ലക്ഷ്മി ആയും വിജയദശമിയിൽ സരസ്വതിയായും ആരാധിക്കാറുണ്ട്.
ഒക്ടോബർ 14 നവരാത്രിയുടെ നാലാം ദിവസമാണ് . ഈ ദിവസം കൂശ്മാണ്ഡ ദേവിയെയാണ് ആരാധിക്കുന്നത് . കൂഷ്മാണ്ഡ ദേവിയുടെ രൂപം ശക്തിയെ പ്രതീകപ്പെടുത്തുന്നു. നവരാത്രിയുടെ നാലാം ദിവസം ദേവിയെ ആരാധിക്കുന്നതിലൂടെ ഭക്തരുടെ എല്ലാ ആഗ്രഹങ്ങളും പൂർത്തീകരിക്കപ്പെടുകയും ജീവിതത്തിൽ നിന്ന് നെഗറ്റീവ് എനർജി നീക്കം ചെയ്യപ്പെടുകയും ചെയ്യും.
കൂഷ്മാണ്ഡ ദേവിയെ ആരാധിക്കുന്നതിലൂടെ ജീവിതത്തിൽ സന്തോഷവും സമൃദ്ധിയും വിജയവും ലഭിക്കും. നാലാം ദിവസം കൂഷ്മാണ്ഡ ദേവിയുടെ പ്രിയപ്പെട്ട നിറത്തിലുള്ള വസ്ത്രം ധരിച്ച് ആരാധിക്കുന്നത് വളരെ ശുഭകരമാണെന്ന് പറയപ്പെടുന്നു. കൂഷ്മാണ്ഡ ദേവിയെ ആരാധിക്കുമ്പോൾ കടും നീല വസ്ത്രം ധരിക്കുന്നത് ശുഭകരമായി കണക്കാക്കപ്പെടുന്നു. ആകാശത്തെയും സമുദ്രത്തെയും പ്രതീകപ്പെടുത്തുന്ന കൂഷ്മാണ്ഡ ദേവിയുടെ പ്രിയപ്പെട്ട നിറമാണിത് . ഇത് വിശാലത, പ്രചോദനം, അനന്തത എന്നിവയെ പ്രതിനിധീകരിക്കുന്നു. കൂടാതെ, ഈ നിറം ശക്തി, ഉത്സാഹം, പോസിറ്റീവിറ്റി എന്നിവയുടെ പ്രതീകമായി കണക്കാക്കപ്പെടുന്നു.ദേവിയെ കൂഷ്മാണ്ഡ ഭാവത്തിൽ ശരണം പ്രാപിച്ചാൽ എല്ലാവിധ രോഗപീഡകളിൽ നിന്ന് മുക്തിയും സമൂഹത്തിൽ സ്ഥാനവും കീർത്തിയും ലഭ്യമാകും
നവരാത്രിയുടെ നാലാം ദിവസം ദേവി കൂഷ്മാണ്ഡയ്ക്ക് ചുവന്ന പൂക്കൾ സമർപ്പിക്കണം. സൂര്യനെ നിയന്ത്രിക്കുന്ന ദേവതയായതിനാൽ തന്നെ ചുവന്നപുഷ്പങ്ങൾക്കൊണ്ടുള്ള പൂജയാണ് പ്രിയം. ചുവന്ന പൂക്കൾ സമർപ്പിക്കുന്നത് ദേവിയെ പ്രീതിപ്പെടുത്തുകയും ഭക്തരുടെ എല്ലാ ആഗ്രഹങ്ങളും നിറവേറ്റുകയും ചെയ്യുമെന്ന് വിശ്വസിക്കപ്പെടുന്നു.
