തിരുവനന്തപുരം ; ഇംഗ്ലീഷ് മാസം ഒന്നാം തീയതി മദ്യവിൽപ്പന വിലക്കുന്ന ഡ്രൈ ഡേയ്ക്കെതിരെ മുഖ്യമന്ത്രി വിഡി സതീശൻ. ഡ്രൈ ഡേ ടൂറിസം മേഖലയ്ക്കെതിരാണെന്നാണ് മുഖ്യമന്ത്രിയുടെ നിലപാട്.അമ്പതിനായിരം രൂപ ഫീസടച്ച് ടൂറിസം മേഖലയിൽ ഡ്രൈ ഡേയിൽ മദ്യം വിളമ്പാൻ അനുവദിക്കുന്നതിനെയും മുഖ്യമന്ത്രി വിമർശിച്ചു. ഇന്നലെ നടന്ന ധനകാര്യ സബ്ജക്ട് കമ്മിറ്റിയിലാണ് മുഖ്യമന്ത്രിയുടെ ഈ നിലപാട്.
ഒന്നാം തീയതിയിൽ ഇപ്പോൾ തന്നെ മദ്യമേഖലയ്ക്ക് ഇളവുണ്ട്. നിശ്ചിത ഫീസടച്ച് ടൂറിസം മേഖലയിലെ വിവിധ ഈവന്റുകളിൽ മദ്യം വിളമ്പാനുള്ള ചട്ട ഭേദഗതി എൽ ഡി എഫ് സർക്കാരിന്റെ കാലത്ത് കൊണ്ടുവന്നിരുന്നു. ഇതു പ്രകാരം 50000 രൂപയാണ് ബാറുടമകൾ എക്സൈനിൽ അടയ്ക്കേണ്ടത്.എന്തിനാണ് 50000 രൂപ ഈടാക്കുന്നത് എന്ന ചോദ്യമാണ് നിയമസഭയിലെ സബ്ജറ്റ് കമ്മിറ്റി യോഗത്തിൽ ഇന്നലെ മുഖ്യമന്ത്രി ഉന്നയിച്ചത്.
മുഖ്യമന്ത്രി തന്നെ അധ്യക്ഷനായ സബ്ജറ്റ് കമ്മിറ്റിയാണ് ധനകാര്യ വകുപ്പിന്റേത് . യോഗത്തിൽ മദ്യവുമായി ബന്ധപ്പെട്ട കാര്യങ്ങൾ ചർച്ച ചെയ്തപ്പോഴാണ് മുഖ്യമന്ത്രി നിലപാട് വ്യക്തമാക്കിയത്.ഒന്നാം തീയതി മദ്യം വിലക്കുമ്പോൾ മാര്യേജ്, ഈവന്റ്, കോൺഫറൻസ് തുടങ്ങിയവ ഉൾപ്പെടുന്ന മൈസ് ടൂറിസത്തെ ബാധിക്കുമെന്നാണ് മുഖ്യമന്ത്രിയുടെ വിലയിരുത്തൽ.

