ന്യൂഡൽഹി : ‘ സേവ് ഇന്ത്യ സേവ് ശരിയ കാമ്പയിൻ ‘ പ്രഖ്യാപിച്ച് ഓൾ ഇന്ത്യ മുസ്ലീം പേഴ്സണൽ ലോ ബോർഡ് . വന്ദേമാതരം, യുജിസി, ശരിയ നിയമം എന്നിവയുൾപ്പെടെ നിരവധി വിഷയങ്ങളിൽ കടുത്ത് എതിർപ്പാണ് ലോ ബോർഡ് ഉന്നയിച്ചിരിക്കുന്നത്. കഴിഞ്ഞ ദിവസം നടന്ന വാർത്താസമ്മേളനത്തിൽ ലോ ബോർഡ് വൈസ് പ്രസിഡന്റ് അബ്ദുർ റഹീം മുജാദിദിയാണ് സേവ് ഇന്ത്യ സേവ് ശരിയ കാമ്പയിൻ പ്രഖ്യാപിച്ചത്.
“സേവ് ഇന്ത്യ, സേവ് ശരീഅത്ത് കാമ്പയിൻ ഞങ്ങൾ ഉടൻ ആരംഭിക്കും. കഴിഞ്ഞ 12 വർഷമായി മുസ്ലീങ്ങൾ പീഡിപ്പിക്കപ്പെടുന്നു. നിയമവിരുദ്ധ പ്രവർത്തനങ്ങൾ തടയൽ നിയമം പല സംസ്ഥാനങ്ങളിലും നടപ്പിലാക്കിയിട്ടുണ്ട്. മദ്രസകളും പള്ളികളും ലക്ഷ്യമിടുന്നു. കൂടാതെ, വന്ദേമാതരത്തിനെതിരെ മുസ്ലീങ്ങൾക്ക് ശക്തമായ എതിർപ്പുണ്ട്. സെപ്റ്റംബർ 17 ന് ജന്തർ മന്തറിൽ നടക്കുന്ന ആദ്യ പരിപാടിയോടെ കാമ്പയിൻ ആരംഭിക്കുമെന്നും “ അദ്ദേഹം പറഞ്ഞു.
‘ സമീപ വർഷങ്ങളിൽ, സമൂഹത്തിലെ വിവിധ വിഭാഗങ്ങൾക്കിടയിൽ അരക്ഷിതാവസ്ഥയും ഉത്കണ്ഠയും വർദ്ധിപ്പിച്ച സംഭവങ്ങളും നയങ്ങളും ഉയർന്നുവന്നിട്ടുണ്ട്. അക്രമം, നിയമവിരുദ്ധമായ പ്രവർത്തനങ്ങൾ, മതസ്വാതന്ത്ര്യവുമായി ബന്ധപ്പെട്ട പ്രശ്നങ്ങൾ, മറ്റ് ചില പ്രവർത്തനങ്ങൾ എന്നിവ ഭരണഘടനാ മൂല്യങ്ങളെ ചോദ്യം ചെയ്യുന്നുണ്ട് . ഞങ്ങളുടെ കാമ്പയിൻ മുസ്ലീം സമൂഹത്തിൽ മാത്രമായി പരിമിതപ്പെടുത്തില്ല.
ഭരണഘടന, ജനാധിപത്യ വ്യവസ്ഥ, നീതി, സമത്വം, മതസ്വാതന്ത്ര്യം, സാമൂഹിക ഐക്യം, ദേശീയ ഐക്യം എന്നിവ ശക്തിപ്പെടുത്തുക എന്നതാണ് ഇതിന്റെ ലക്ഷ്യം. ബുദ്ധിജീവികൾ, അഭിഭാഷകർ, മനുഷ്യാവകാശ പ്രവർത്തകർ, സാമൂഹിക സംഘടനകൾ, സിവിൽ സമൂഹം എന്നിവരോടും ഈ കാമ്പെയ്നിൽ പങ്കുചേരാൻ ബോർഡ് അഭ്യർത്ഥിച്ചിട്ടുണ്ട്.
ഭരണഘടനയും നിയമത്തിന്റെ പരമാധികാരവും, മതസ്വാതന്ത്ര്യവും സംരക്ഷിക്കുന്നതിനും ഭരണഘടനാ അവകാശങ്ങളെക്കുറിച്ചുള്ള അവബോധം വളർത്തുന്നതിനും ഈ പ്രസ്ഥാനം ഊന്നൽ നൽകും. ആൾക്കൂട്ട ആക്രമണത്തിനും നിയമവിരുദ്ധമായ പ്രവർത്തനങ്ങൾക്കും എതിരെ പൊതുജനാഭിപ്രായം സൃഷ്ടിക്കും. വിദ്വേഷം, വർഗീയത, അക്രമം എന്നിവയ്ക്കെതിരെ സമാധാനം, സാഹോദര്യം, പരസ്പര ബഹുമാനം എന്നിവയുടെ സന്ദേശം പ്രചരിപ്പിക്കുകയും ചെയ്യും.“ ബോർഡ് പറയുന്നു.
യൂണിഫോം സിവിൽ കോഡ് (യുസിസി) നടപ്പിലാക്കൽ, വന്ദേമാതരം നിർബന്ധമായും ആലപിക്കൽ തുടങ്ങിയ വിഷയങ്ങളും കാമ്പയിനിന്റെ പ്രധാന വിഷയങ്ങളായി ബോർഡ് ഉൾപ്പെടുത്തിയിട്ടുണ്ട്. കൂടാതെ, മതപരമായ സ്ഥലങ്ങളുടെ സംരക്ഷണവും ന്യൂനപക്ഷങ്ങളുടെ ഭരണഘടനാ അവകാശങ്ങളും സംബന്ധിച്ച ചോദ്യങ്ങളും ഉന്നയിക്കപ്പെടും.
കാമ്പയിൻ ഘട്ടം ഘട്ടമായി തുടരാനാണ് പദ്ധതി. ഇതിന്റെ കീഴിൽ, രാജ്യത്തുടനീളമുള്ള പ്രധാന നഗരങ്ങളിൽ ഭരണഘടനാപരവും സമാധാനപരവുമായ പൊതുയോഗങ്ങളും പ്രതിഷേധങ്ങളും സംഘടിപ്പിക്കും. വിവിധ മതങ്ങളുടെയും ബുദ്ധിജീവികളുടെയും സാമൂഹിക സംഘടനകളുടെയും പങ്കാളിത്തം ഉറപ്പാക്കാൻ ശ്രമിക്കും.
വിവിധ സംസ്ഥാനങ്ങളിലെ ഗവർണർമാർ വഴിയും ജില്ലാ ഭരണകൂടങ്ങൾ വഴിയും രാഷ്ട്രപതിക്ക് തങ്ങളുടെ ആവശ്യങ്ങളുടെ നിവേദനങ്ങൾ സമർപ്പിക്കും. പ്രസ്ഥാനവുമായി ബന്ധപ്പെട്ട നിയമപരമായ പ്രശ്നങ്ങളും പൗരാവകാശങ്ങളും സംബന്ധിച്ച് വിശദമായ നിയമ ഗൈഡ് പുറപ്പെടുവിക്കാനും പദ്ധതിയുണ്ട്.
സോഷ്യൽ മീഡിയ, ഡിജിറ്റൽ പ്ലാറ്റ്ഫോമുകൾ എന്നിവയിലൂടെയും ഈ കാമ്പയിൻ വ്യാപകമായി നടത്തപ്പെടും. പൂർണ്ണമായും ഭരണഘടനാപരവും ജനാധിപത്യപരവും സമാധാനപരവുമായ രീതിയിലായിരിക്കും കാമ്പയിൻ നടത്തുകയെന്ന് എ.ഐ.എം.പി.എൽ.ബി അറിയിച്ചു. കാമ്പയിൻ്റെ പ്രധാന ഘട്ടമായി ന്യൂഡൽഹിയിൽ പ്രധാന ദേശീയ സമ്മേളനവും പൊതു പ്രകടനവും ആസൂത്രണം ചെയ്തിട്ടുണ്ട്.
