പത്തനംതിട്ട : അയ്യപ്പഭക്തർ ഇരുമുടിക്കെട്ടിൽ അനാവശ്യ സാധനങ്ങൾ ഒഴിവാക്കണമെന്ന് ശബരിമല തന്ത്രി .ഇരുമുടിക്കെട്ടിൽ ഉൾപ്പെടുത്തേണ്ടത് ഒഴിവാക്കേണ്ടതുമായ സാധനങ്ങൾ ഏതൊക്കെയെന്ന് നിർദ്ദേശിച്ച് തന്ത്രി കണ്ഠര് രാജീവര് തിരുവിതാംകൂർ ദേവസ്വം ബോർഡ് പ്രസിഡന്റിന് കത്ത് നൽകി. പിൻ കെട്ടിൽ അരി മാത്രം കരുതിയാൽ മതിയെന്നും, ചന്ദനത്തിരി , കർപ്പൂരം , പനിനീര് എന്നിവ ഒഴിവാക്കണമെന്നും നിർദേശമുണ്ട് . പ്ലാസ്റ്റിക്കും വിലക്കിയിട്ടുണ്ട്.
മുൻ കെട്ടിൽ ഉണക്കലരി, നെയ്തെങ്ങ, ശർക്കര, കദളിപ്പഴം, വെറ്റില ,അടയ്ക്ക, കാണിപ്പൊന്ന് എന്നിവ മാത്രം മതി. തന്ത്രിയുടെ നിർദ്ദേശം കേരളത്തിലെ മറ്റു ദേവസ്വം ബോർഡുകളുടെ അധ്യക്ഷന്മാർ , കമ്മീഷണർമാർ തുടങ്ങിയവരെയും അറിയിക്കും.
പാലിക്കാൻ തിരുവിതാംകൂർ ദേവസ്വം ബോർഡിന് കീഴിലുള്ള 1252 ക്ഷേത്രങ്ങളിലുമുളള ഗുരുസ്വാമി മാരോട് നിർദ്ദേശിക്കണം എന്ന് ആവശ്യപ്പെട്ട് കത്ത് നൽകുമെന്ന് പ്രസിഡന്റ് പി എസ് പ്രശാന്ത് പറഞ്ഞു.
‘ ഇപ്പോൾ ശബരിമലയിൽ വരുന്ന അയ്യപ്പ ഭക്തർ കൊണ്ടുവരുന്ന ഇരുമുടിക്കെട്ടിൽ പ്ലാസ്റ്റിക് കടന്നു വരുന്നുണ്ട് . ഇത് ശബരിമലയിൽ വലിയ പാരിസ്ഥിതിക പ്രശ്നങ്ങളാണ് ഉണ്ടാക്കുന്നത് .
ഇരുമുടിക്കെട്ടിൽ രണ്ടു ഭാഗങ്ങൾ ആണുള്ളത് മുൻകെട്ട് ശബരിമലയിൽ സമർപ്പിക്കാനുള്ള സാധനങ്ങൾ പിൻകെട്ട് ഭക്ഷണപദാർത്ഥങ്ങൾ. പണ്ടൊക്കെ ഭക്തർ കാൽനടയായി വന്നപ്പോഴാണ് ഇടയ്ക്ക് താവളം അടിച്ച് ഭക്ഷണം ഒരുക്കാൻ അരി നാളികേരം തുടങ്ങിയവ പിൻകെട്ടിൽ കൊണ്ടുവന്നിരുന്നത്.
ഇപ്പോൾ എല്ലായിടവും ഭക്ഷണസൗകര്യം ഉള്ളതിനാൽ അതിന്റെ ആവശ്യമില്ല. പിൻകട്ടിൽ കുറച്ച് അരി കരുതിയാൽ മതി. ഇത് ശബരിമലയിൽ സമർപ്പിച്ച വെള്ള നിവേദ്യം വാങ്ങാം. മുൻകെട്ടിൽ ആവശ്യമില്ലാത്ത ചന്ദനത്തിരി, കർപ്പൂരം ,പനിനീർ ഇവയെല്ലാം ഒഴിവാക്കണം . ഇതും ഇവിടെ ഉപയോഗിക്കുന്നില്ല . മുൻ കെട്ടിൽ ഉണക്കലരി, നെയ്തെങ്ങ, ശർക്കര, കദളിപ്പഴം, വെറ്റില ,അടയ്ക്ക, കാണിപ്പൊന്ന് എന്നിവ മാത്രം മതിയാകും ‘ എന്നാണ് തന്ത്രിയുടെ കത്തിൽ പറയുന്നത് .
