കോട്ടയം: മുന്നണി മാറ്റത്തെക്കുറിച്ച് പറഞ്ഞ് ആരും ഞങ്ങൾക്ക് വേണ്ടി കണ്ണീർ പൊഴിക്കേണ്ടതില്ലെന്ന് കേരള കോൺഗ്രസ് (എം) ചെയർമാൻ ജോസ് കെ മാണി . കേരള കോൺഗ്രസ് ഇടതുപക്ഷത്തോടൊപ്പം ഉറച്ചുനിൽക്കുന്നുവെന്നും അദ്ദേഹം പറഞ്ഞു.
‘എന്റെ പിതാവിന്റെ സുഹൃത്ത് ദുബായിൽ ഐസിയുവിൽ ചികിത്സയിലാണ്. കുടുംബത്തോടൊപ്പം അദ്ദേഹത്തെ കാണാൻ പോയതിനാൽ എനിക്ക് സിപിഎമ്മിന്റെ ചടങ്ങിൽ പങ്കെടുക്കാൻ കഴിഞ്ഞില്ല. ഞാൻ മുഖ്യമന്ത്രിയെ അറിയിച്ചിരുന്നു. കേരള കോൺഗ്രസിന്റെ എല്ലാ എംഎൽഎമാരും ചടങ്ങിൽ പങ്കെടുത്തിരുന്നു. കേരള കോൺഗ്രസ് എവിടെയായാലും അവിടെ സർക്കാരുണ്ടാകും. കേരള കോൺഗ്രസ് ഇടതുപക്ഷത്തോടൊപ്പമാണ്. നിലപാട് ഉറച്ചതാണ്. ഞങ്ങൾ ഇവിടെ മാറിയോ ഇല്ലയോ എന്നതിനെക്കുറിച്ചുള്ള ചർച്ചകൾക്ക് പ്രസക്തിയില്ല.
മുന്നണിയുടെ എല്ലാ യോഗങ്ങളിലും ഞാൻ പങ്കെടുത്തിട്ടില്ല. പകരം, പ്രതിനിധികൾ അവിടെ ഉണ്ടായിരുന്നു. ഇങ്ങനെ ചർച്ചകൾ നടത്തേണ്ട ആവശ്യമില്ല. പലരും ഞങ്ങളെ അവരുടെ മുന്നണികളിൽ ചേരാൻ ക്ഷണിക്കുന്നുണ്ട്, കാരണം ഞങ്ങൾക്ക് അത്രയും പ്രാധാന്യമുണ്ട്. രാഷ്ട്രീയ സംവിധാനത്തിൽ വ്യത്യസ്ത അഭിപ്രായങ്ങളുണ്ടാകും, പക്ഷേ അന്തിമ തീരുമാനം പാർട്ടിയുടേതായിരിക്കും,’ ജോസ് കെ മാണി വ്യക്തമാക്കി.
കോൺഗ്രസ് നേതാവ് സോണിയ ഗാന്ധി നേരിട്ട് ജോസ് കെ മാണിയെ വിളിച്ച് യുഡിഎഫിലേക്ക് മടങ്ങാൻ അഭ്യർത്ഥിച്ചതോടെയാണ് മുന്നണി മാറ്റ വാർത്തകൾ ശക്തമായത് . പാലാ ഉൾപ്പെടെയുള്ള പഴയ സീറ്റുകൾ തിരികെ വേണമെന്ന നിബന്ധന ജോസ് കെ മാണി മുന്നോട്ടുവച്ചതായി റിപ്പോർട്ടുകൾ ഉണ്ടായിരുന്നു. അതേസമയം, നിലപാട് വ്യക്തമാക്കാൻ മന്ത്രി റോഷി അഗസ്റ്റിനും പ്രമോദ് നാരായൺ എംഎൽഎയും രംഗത്തെത്തിയിരുന്നു. ഇടതുപക്ഷത്ത് തന്നെ തുടരുമെന്ന് ഇരുവരും ഫേസ്ബുക്കിൽ കുറിച്ചു.
