കൊച്ചി: നടൻ സൗബിൻ ഷാഹിറിന് വിദേശയാത്രയ്ക്ക് അനുമതി നിഷേധിച്ച് മജിസ്ട്രേറ്റ് കോടതി . നടൻ പ്രതിയായ സാമ്പത്തിക തട്ടിപ്പ് കേസിൽ ജാമ്യ വ്യവസ്ഥകളുടെ ഭാഗമായാണ് തീരുമാനം. അവാർഡ് നിശയിൽ പങ്കെടുക്കാൻ വിദേശയാത്ര നടത്താൻ സൗബിൻ കോടതിയിൽ നിന്ന് അനുമതി തേടിയിരുന്നു.
മഞ്ഞുമ്മൽ ബോയ്സ് എന്ന സിനിമയുമായി ബന്ധപ്പെട്ട സാമ്പത്തിക തട്ടിപ്പ് കേസിലാണ് വിലക്ക്. സൗബിൻ, സഹപ്രതികളായ ഷോൺ ആന്റണി, ബാബു ഷാഹിർ എന്നിവരെ അന്വേഷണത്തിൽ ഇതിനകം ചോദ്യം ചെയ്തിട്ടുണ്ട്. കേസ് തള്ളണമെന്ന അവരുടെ ഹർജി നേരത്തെ ഹൈക്കോടതി തള്ളിയിരുന്നു.
സിനിമയിൽ നിന്നുള്ള ലാഭത്തിന്റെ വിഹിതം തനിക്ക് നൽകിയില്ലെന്ന് ആരോപിച്ച് മരട് സ്വദേശി സിറാജ് വലിയതുറ നൽകിയ പരാതിയുടെ അടിസ്ഥാനത്തിലാണ് കേസ് രജിസ്റ്റർ ചെയ്തത്. എന്നാൽ, സിറാജ് സിനിമയിൽ നിക്ഷേപിക്കേണ്ട മുഴുവൻ തുകയും കൃത്യസമയത്ത് നൽകിയില്ലെന്ന് നിർമ്മാതാക്കൾ വാദിച്ചു. ഈ കാലതാമസം കാരണം, ഷൂട്ടിംഗ് ഷെഡ്യൂളുകൾ തടസ്സപ്പെടുകയും നിർമ്മാണം നീണ്ടുപോവുകയും ചെയ്തുവെന്നും അവർ പറഞ്ഞു.
