തിരുവനന്തപുരം: എംഎൽഎ രാഹുൽ മാങ്കൂട്ടത്തിലിനെതിരെ പരാതി ഉന്നയിച്ചവരിൽ നിന്ന് മൊഴി രേഖപ്പെടുത്താൻ ക്രൈംബ്രാഞ്ച് . സോഷ്യൽ മീഡിയയിലൂടെയും മറ്റ് സ്രോതസ്സുകളിലൂടെയും വെളിപ്പെടുത്തലുകൾ നടത്തിയ മൂന്ന് പേരുടെ മൊഴികൾ രേഖപ്പെടുത്തിയാണ് ക്രൈംബ്രാഞ്ച് അന്വേഷണം ആരംഭിക്കുക. മോശം അനുഭവങ്ങൾ ഉണ്ടായ സ്ത്രീകളെ കണ്ടെത്താനും ശ്രമിക്കും.
അവരുടെ മൊഴികൾ രേഖപ്പെടുത്തിയതിനുശേഷം മാത്രമേ ഗുരുതരമായ വകുപ്പുകൾ പ്രകാരം കേസ് സാധുവാകൂ. ക്രൈംബ്രാഞ്ച് തിരുവനന്തപുരം റേഞ്ച് ഡിവൈഎസ്പി സി. ബിനുകുമാറിനാണ് അന്വേഷണ ചുമതല. ഇതുവരെ ലഭിച്ച ഒമ്പത് പരാതികളും മാധ്യമ റിപ്പോർട്ടുകളുടെ അടിസ്ഥാനത്തിലാണ് രജിസ്റ്റർ ചെയ്തത് .
നിർബന്ധിത ഗർഭഛിദ്രം ആരോപിച്ച് കേസെടുക്കണമെന്ന് ഹൈക്കോടതി അഭിഭാഷകൻ എറണാകുളം സെൻട്രൽ പോലീസിൽ പരാതി നൽകിയിരുന്നു. ലഭിച്ച പരാതികൾ പോലീസ് മേധാവി പരിശോധിച്ച് ഗുരുതരമായ കുറ്റകൃത്യങ്ങളാണെന്ന് കണ്ടെത്തിയതിനെത്തുടർന്ന് ഡിജിപിയുടെ നിർദ്ദേശപ്രകാരമാണ് കേസ് രജിസ്റ്റർ ചെയ്തത് . ഇക്കാര്യത്തിൽ പൊലീസ് നിയമോപദേശവും തേടിയിരുന്നു . രാഹുൽ മാങ്കൂട്ടത്തിൽ യുവതിയെ ഗർഭഛിദ്രത്തിന് നിർബന്ധിച്ചുവെന്ന പരാതിയിൽ കേരള കോൺഗ്രസ് നേതാവ് എ.എച്ച്. ഹഫീസിന്റെ മൊഴി മ്യൂസിയം പോലീസ് രേഖപ്പെടുത്തിയിട്ടുണ്ട്. ക്രൈംബ്രാഞ്ച് മേധാവി എച്ച്. വെങ്കിടേഷ് അന്വേഷണത്തിന് മേൽനോട്ടം വഹിക്കും.
രാഹുലുമായി മോശം അനുഭവങ്ങൾ ഉണ്ടായിട്ടുണ്ടെന്ന് പറഞ്ഞവരെ തിരിച്ചറിയുന്നതിനും അന്വേഷണവുമായി സഹകരിക്കണമെന്ന് ആവശ്യപ്പെട്ടും ക്രൈംബ്രാഞ്ച് നോട്ടീസ് നൽകും. ഇരകൾ മൊഴി നൽകാൻ തയ്യാറായില്ലെങ്കിൽ കേസ് അവസാനിപ്പിക്കേണ്ടിവരും. ഇരകളെ തിരിച്ചറിയുന്നതിനും തെളിവുകൾ ശേഖരിക്കുന്നതിനുമായി രാഹുലിന്റെ ഫോണും ലാപ്ടോപ്പും പിടിച്ചെടുക്കാനും നീക്കമുണ്ട് . . ഇതിനായി സൈബർ വിദഗ്ധരെയും അന്വേഷണ സംഘത്തിൽ ഉൾപ്പെടുത്തും.
സോഷ്യൽ മീഡിയ വഴി സ്ത്രീകളെ പിന്തുടരുകയും ഉപദ്രവിക്കുകയും ചെയ്യുക, മാനസിക വേദനയുണ്ടാക്കുന്ന രീതിയിൽ പ്രവർത്തിക്കുക, ഗർഭഛിദ്രത്തിന് നിർബന്ധിച്ച് സന്ദേശങ്ങൾ അയയ്ക്കുക എന്നീ കുറ്റങ്ങളാണ് രാഹുലിനെതിരെ ചുമത്തിയിരിക്കുന്നത്. ഇരകളെ തിരിച്ചറിഞ്ഞ് അവരുടെ മൊഴികൾ രേഖപ്പെടുത്തിയാൽ മാത്രമേ കേസ് സാധുവാകൂ.
