റിയാദ് ; സൗദി അറേബ്യയിൽ ഹൂത്തി ആക്രമണം തുടരുന്ന സാഹചര്യത്തിൽ, ഇന്ത്യൻ പൗരന്മാർക്ക് സുരക്ഷാ മുന്നറിയിപ്പുമായി ഇന്ത്യൻ എംബസി . പ്രാദേശിക അധികാരികളുടെ നിർദ്ദേശങ്ങൾ പാലിക്കാനും തിരക്കേറിയ പ്രദേശങ്ങൾ ഒഴിവാക്കാനും എംബസി നൽകിയ മുന്നറിയിപ്പിൽ പറയുന്നു.
“ജനാലകളിൽ നിന്ന് അകലെ ഒരു ഇൻഡോർ മുറിയിൽ താമസിക്കുന്നതാണ് നല്ലത്. പുറത്തുള്ളവർ ഉടൻ തന്നെ അടുത്തുള്ള കെട്ടിടത്തിലേക്ക് മാറുകയോ ശക്തമായ കെട്ടിടങ്ങളിൽ അഭയം തേടുകയോ വേണം.
മുന്നറിയിപ്പ് ലഭിച്ചാലുടൻ, പാലങ്ങളിൽ നിന്നും ഉയരമുള്ള കെട്ടിടങ്ങൾക്കരികിൽ നിന്നും മാറി, റോഡരികിൽ വാഹനങ്ങൾ നിർത്താൻ ഡ്രൈവർമാർക്ക് നിർദ്ദേശം നൽകിയിട്ടുണ്ട്. അടിയന്തര സാഹചര്യത്തിലോ എന്തെങ്കിലും അപകട സാധ്യതയോ ഉണ്ടായാൽ, മക്ക, മദീന, റിയാദ്, കിഴക്കൻ പ്രവിശ്യ എന്നിവിടങ്ങളിലെ താമസക്കാർക്ക് 911 എന്ന നമ്പറിൽ വിളിക്കാം. സൗദി അറേബ്യയുടെ മറ്റ് ഭാഗങ്ങളിൽ താമസിക്കുന്നവർക്ക് 998 എന്ന നമ്പറിൽ വിളിക്കാം.
ഒക്ടോബർ 10 ന് റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിൽ നടന്ന മാരകമായ ആക്രമണത്തിൽ ഒരു ഇന്ത്യക്കാരൻ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തിരുന്നു . ഈ സംഭവത്തിന്റെ പശ്ചാത്തലത്തിൽ, ഇന്ത്യൻ എംബസി സുരക്ഷാ നിർദേശങ്ങൾ ആവർത്തിച്ച് നൽകുന്നുണ്ട്.
സൗദി അറേബ്യയിലെ ഇന്ത്യൻ പൗരന്മാർ പ്രാദേശിക അധികാരികളുടെ നിർദ്ദേശങ്ങൾ പാലിക്കണമെന്നും വ്യോമാക്രമണ സമയത്ത് വീടിനുള്ളിൽ തന്നെ തുടരണമെന്നും നടന്നുകൊണ്ടിരിക്കുന്ന സംഭവങ്ങളുമായി ബന്ധപ്പെട്ട ഏതെങ്കിലും വിവരങ്ങളോ ഫോട്ടോകളോ വീഡിയോകളോ സോഷ്യൽ മീഡിയയിൽ സൃഷ്ടിക്കുകയോ പങ്കിടുകയോ പോസ്റ്റ് ചെയ്യുകയോ ചെയ്യരുതെന്നും എംബസി ആവശ്യപ്പെട്ടിരുന്നു.
