ഡൽഹി :ഉത്തർ പ്രാദേശിലെ പ്രയാഗ് രാജിൽ മഹാകുംഭമേളയ്ക്കിടെ വൻ തീപ്പിടുത്തം. നിരവധി ടെന്റുകൾ കത്തി നശിച്ചു. തീർത്ഥാടകർക്കായി ഒരുക്കിയ ക്യാമ്പിലെ പാചകവാത സിലണ്ടറിൽ നിന്നാണ് തീപ്പിടുത്തം ഉണ്ടായത്. ഇത് വരെ ആളപായം റിപ്പോർട്ട് ചെയ്തിട്ടില്ല.
പ്രയാഗ് രാജിലെ ശാസ്ത്രി പാലത്തിനു സമീപമാണ് തീ ഉയരുന്നത് കണ്ടത്. തുടർന്ന് തീ അണയ്ക്കാനുള്ള ശ്രമങ്ങൾ ആരംഭിക്കുകയായിരുന്നു . ഏറെ നേരത്തെ പരിശ്രമത്തിന് ശേഷമാണ് തീ അണയ്ക്കാൻ സാധിച്ചത്.
തീ പിടിച്ചതിനെ തുടർന്ന് ചുറ്റിലും വലിയ രീതിയിൽ പുകയുയർന്നത് പരിഭ്രാന്തി പരത്തിയെങ്കിലും കൃത്യസമയത്തെ ഇടപെടൽ കാരണം വൻ ദുരന്തമാണ് ഒഴിവായത്.
മൊത്തം 10 ടെന്റുകളാണ് കത്ത് നശിച്ചത്. സെക്ടർ പത്തൊമ്പതിൽ ഗീതാപ്രസ്സിന്റെ ടെന്റിലാണ് തീ ഉയർന്നത്.
ഉത്തർപ്രദേശിലെ പ്രയാഗ് രാജിലെ മഹാ കുംഭ മേളയിൽ പങ്കെടുക്കുവാൻ ലോകത്തിലെ പല ഭാഗങ്ങളിൽ നിന്നുമാണ് തീർത്ഥാടകർ എത്തിക്കൊണ്ടിരിക്കുന്നത്. അതുകൊണ്ടുതന്നെ തീർത്ഥാടകരുടെ വൻ തിരക്കും അനുഭവപ്പെടുന്നുണ്ട്. തീർത്ഥാടകരുടെ തിരക്ക് മാനിച്ച് വലിയ സന്നാഹങ്ങളാണ് പ്രാദേശിക, ജില്ലാ ഭരണകൂടങ്ങളും സംസ്ഥാന, കേന്ദ്ര സർക്കാരുകളും ഒരുക്കിയിരിക്കുന്നത്
