ഡബ്ലിൻ ; യുഎസിൽ വെച്ച് ജി20 ധനമന്ത്രിമാരുമായി ചർച്ച നടത്താൻ ടാനൈസ്റ്റെയും ധനകാര്യ മന്ത്രിയുമായ സൈമൺ ഹാരിസ് . നോർത്ത് കരോലിനയിലെ രണ്ട് ദിവസത്തെ സന്ദർശനത്തിൽ ബ്രിട്ടന്റെ ചാൻസലർ ഓഫ് ദി എക്സ്ചെക്കർ ജോൺ ഹീലി, കാനഡയുടെ ധനമന്ത്രി ഫ്രാങ്കോയിസ്-ഫിലിപ്പ് ഷാംപെയ്ൻ എന്നിവരുമായുള്ള കൂടിക്കാഴ്ചകളും നടക്കും.
ആഗോള സമ്പദ്വ്യവസ്ഥയെക്കുറിച്ച് ചർച്ച ചെയ്യുന്നതിനായി ജി20 രാജ്യങ്ങളിൽ നിന്നുള്ള ധനമന്ത്രിമാരും സെൻട്രൽ ബാങ്ക് ഗവർണർമാരും ഈ ആഴ്ച യോഗം ചേരും. കൂടാതെ വ്യക്തിഗത രാജ്യങ്ങളുടെ ഊർജ്ജ സുരക്ഷയും സാമ്പത്തിക സ്ഥിരതയും ചർച്ചയാകും.
അയർലൻഡിന്റെ യൂറോപ്യൻ യൂണിയൻ പ്രസിഡന്റ് സ്ഥാനത്തിന്റെ ഭാഗമായി, യൂറോപ്യൻ സെൻട്രൽ ബാങ്ക് പ്രസിഡന്റ് ക്രിസ്റ്റീൻ ലഗാർഡ്, യൂറോപ്യൻ യൂണിയൻ കമ്മീഷണർ വാൽഡിസ് ഡോംബ്രോവ്സ്കിസ് എന്നിവരോടൊപ്പമാണ് ഹാരിസും ചർച്ചയിൽ പങ്കെടുക്കുന്നത്. അതേസമയം, യൂറോപ്യൻ യൂണിയൻ അംഗരാജ്യങ്ങളിൽ നിന്നുള്ള പ്രതിരോധ, വിദേശകാര്യ മന്ത്രിമാർ പങ്കെടുക്കുന്ന യോഗങ്ങൾ ഈ ആഴ്ച അയർലൻഡിൽ നടക്കും.
വിദേശകാര്യ, പ്രതിരോധ മന്ത്രി ഹെലൻ മക്കെന്റീ അധ്യക്ഷതയിൽ നടക്കുന്ന അനൗപചാരിക ഉച്ചകോടിക്കായി 17 യൂറോപ്യൻ യൂണിയൻ അംഗരാജ്യങ്ങളിൽ നിന്നുള്ള പ്രതിരോധ മന്ത്രിമാർ അയർലൻഡിലെത്തും.
