കോളിളക്കമെന്ന ക്ലാസിക് ചിത്രത്തിൻ്റെ രണ്ടാം ഭാഗവുമായി ഇതിഹാസ നടൻ ജയൻ എത്തിയാലാ..? അത്തരമൊരു എഐ വീഡിയോ അണിയിച്ചൊരുക്കിയിരിക്കുകയാണ് ഒരു പേജ്. മൾട്ടിവേഴ്സ് മാട്രിക്സ് എന്ന ഇൻസ്റ്റഗ്രാം ഹാൻഡിലിലാണ് വീഡിയോ പ്രത്യക്ഷപ്പെട്ടത്. നിമിഷ നേരങ്ങൾക്കുള്ളിൽ സംഭവം വൈറലായി. എഐ സാങ്കേതിക വിദ്യ ഉപയോഗിച്ചാണ് വീഡിയോ ഒരുക്കിയിരിക്കുന്നത്. കൂളിംഗ് ഗ്ലാസും വച്ച് , കൈയ്യിൽ തോക്കുമായാണ് ജയൻ അബ്രാം ഖുറേഷിയായി വരുന്നത് .
ലൂസിഫർ ക്ലൈമാക്സിൽ മോഹൻലാലിന് പകരം ജയൻ വരുന്നതായാണ് അവതരിപ്പിച്ചിരിക്കുന്നത്. ഒപ്പം എതിരാളിയായി സാക്ഷാൽ ടോം ക്രൂസും വരുന്നുണ്ട്. കോളിളക്കം 2 എന്നാണ് വീഡിയോയ്ക്ക് നൽകിയിരിക്കുന്ന പേര് . നിരവധി പേർ വീഡിയോ സമൂഹമാദ്ധ്യമങ്ങളിൽ പങ്കുവച്ചിട്ടുണ്ട്. ‘ എന്റെ ഇഷ്ട നടൻ ഇപ്പോഴും ജീവിച്ചിരിക്കുന്നു ‘ എന്ന അടിക്കുറിപ്പോടെ നടൻ ബൈജുവും വീഡിയോ ഷെയർ ചെയ്തിട്ടുണ്ട്.
അടുത്തിടെ മോഹൻലാലിനെയും, മമ്മൂട്ടിയേയും ഹോളിവുഡ് നായകന്മാരാക്കി എ ഐ വീഡിയോകൾ ഇറങ്ങിയിരുന്നു. ഇതും സോഷ്യൽ മീഡിയ ഏറ്റെടുത്ത് ആഘോഷമാക്കിയിരുന്നു.
