ന്യൂഡൽഹി : വിദേശ സംഭാവന ഭേദഗതി ബില്ലിനെച്ചൊല്ലിയുള്ള തർക്കം തുടരുന്നു. മിസോറാം മുഖ്യമന്ത്രി ലാൽദുഹോമ, ആഭ്യന്തരമന്ത്രി അമിത് ഷായുമായി കൂടിക്കാഴ്ച നടത്തിയ ശേഷം, ഓഗസ്റ്റ് 12 ന് ബിൽ പാർലമെന്റിൽ അവതരിപ്പിച്ച് പാസാക്കുമെന്ന് പ്രഖ്യാപിച്ചെങ്കിലും ഇക്കാര്യത്തിൽ സ്ഥിരീകരണം ഉണ്ടായിട്ടില്ല.
ബില്ലിലെ വ്യവസ്ഥകളെക്കുറിച്ച് ക്രിസ്ത്യൻ സമൂഹവും എൻജിഒകളും ആശങ്ക പ്രകടിപ്പിച്ചിട്ടുണ്ട്. ഇതേ തുടർന്ന് രാജ്യസഭാ എംപി പി. വിൽസന്റെ നേതൃത്വത്തിൽ ക്രിസ്ത്യൻ മതനേതാക്കളുടെ 10 അംഗ പ്രതിനിധി സംഘം കേന്ദ്ര ആഭ്യന്തര മന്ത്രി അമിത് ഷായുമായി കൂടിക്കാഴ്ച നടത്തിയിരുന്നു. എഫ്സിആർഎ ബിൽ പിൻവലിക്കുകയോ സംയുക്ത പാർലമെന്ററി കമ്മിറ്റിക്ക് പുനഃപരിശോധനയ്ക്കായി അയയ്ക്കുകയോ ചെയ്യണമെന്ന് പ്രതിനിധി സംഘം ആഭ്യന്തരമന്ത്രി മുമ്പാകെ ആവശ്യം ഉന്നയിച്ചു.
ഇത് രണ്ടാം തവണയാണ് കാത്തലിക് ബിഷപ്പ്സ് കോൺഫറൻസ് ഓഫ് ഇന്ത്യ അമിത് ഷായുമായി കൂടിക്കാഴ്ച നടത്തുന്നത്. നേരത്തെ, ജൂലൈ 10 ന്, സിബിസിഐ ബിൽ പിൻവലിച്ച് എല്ലാ പങ്കാളികളുമായും കൂടിയാലോചിച്ച ശേഷം പുതിയത് തയ്യാറാക്കണമെന്ന് ആവശ്യപ്പെട്ട് ആഭ്യന്തര മന്ത്രിക്ക് കത്തെഴുതിയിരുന്നു.
അമിത് ഷാ എല്ലാ പ്രതിനിധികളുടെയും വാക്കുകൾ ശ്രദ്ധയോടെ കേൾക്കുകയും അവരുടെ ആശങ്കകൾ രേഖപ്പെടുത്തുകയും ചെയ്തുവെന്ന് സിബിസിഐ വൃത്തങ്ങൾ അറിയിച്ചു. ഈ നിയമം ക്രിസ്ത്യൻ മിഷനറിമാരെയും സാമൂഹിക ഗ്രൂപ്പുകളെയും പ്രതികൂലമായി ബാധിക്കില്ലെന്ന് സർക്കാർ ഉറപ്പ് നൽകിയിട്ടുണ്ട്.
നേരത്തെ, മിസോറാം മുഖ്യമന്ത്രി ലാൽദുഹോമ, മിസോറാം കൊഹ്രാൻ ഹ്രുവൈതു കമ്മിറ്റി (എംകെഎച്ച്സി) പ്രസിഡന്റ് ജോൺ റാൽദോസംഗ, മിസോറാം കൗൺസിൽ ഓഫ് ചർച്ചസ് ഇൻ മിസോറം (സിസിഎം) ജനറൽ സെക്രട്ടറി ലാൽമംഗൈഹ എന്നിവരും അമിത് ഷായ്ക്ക് കത്ത് നൽകിയിരുന്നു. മുൻകാല പ്രാബല്യത്തോടെ ഇത് നടപ്പിലാക്കുകയാണെങ്കിൽ, പതിറ്റാണ്ടുകളായി പ്രവർത്തിക്കുന്ന സ്കൂളുകൾ, ആശുപത്രികൾ, അനാഥാലയങ്ങൾ, പുനരധിവാസ കേന്ദ്രങ്ങൾ എന്നിവയെ നിയമം ബാധിക്കുമെന്ന് ലാൽദുഹോമ പറഞ്ഞു.
രജിസ്ട്രേഷൻ റദ്ദാക്കപ്പെട്ടതോ കാലാവധി കഴിഞ്ഞതോ ആയ സംഘടനകളുടെ വിദേശ സംഭാവനകളും ആസ്തികളും നിരീക്ഷിക്കാൻ ഒരു പ്രത്യേക ‘ഡിസിഗ്നേറ്റഡ് അതോറിറ്റി’യെ നിയമിക്കുക എന്നതാണ് ഈ ബില്ലിലെ പ്രധാന വ്യവസ്ഥ. ഇതിനെയാണ് പല സംഘടനകളും എതിർക്കുന്നതും.
