തിരുവനന്തപുരം: മാസപ്പടി കേസിൽ പ്രതിപക്ഷ നേതാവ് പിണറായി വിജയന്റെ മകൾ വീണ ടിക്ക് എൻഫോഴ്സ്മെന്റ് ഡയറക്ടറേറ്റ് (ഇഡി) വീണ്ടും സമൻസ് അയച്ചു. ജൂൺ 29 ന് രാവിലെ 10.30 ന് കൊച്ചിയിലെ ഓഫീസിൽ ചോദ്യം ചെയ്യലിന് ഹാജരാകണമെന്നാണ് സമൻസിൽ പറയുന്നത്.
രണ്ട് ദിവസങ്ങൾക്ക് മുൻപും ഇഡി വീണയെ ഒമ്പത് മണിക്കൂർ ചോദ്യം ചെയ്തിരുന്നു. രാവിലെ 11 മണിക്ക് ആരംഭിച്ച ചോദ്യം ചെയ്യൽ വൈകുന്നേരം 6 മണിക്കാണ് അവസാനിച്ചത്. സിഎംആർഎല്ലും, വീണയുടെ എക്സലോജിക് സൊല്യൂഷൻസും തമ്മിലുള്ള സാമ്പത്തിക ഇടപാടുകളുമായി ബന്ധപ്പെട്ടാണ് കേസ്. എക്സലോജിക്കിന് 2017 മുതൽ 2020 വരെ സിഎംആർഎൽ 1.72 കോടി രൂപ നൽകിയതായി ആദായനികുതി തർക്ക പരിഹാര ബോർഡ് കണ്ടെത്തി. പക്ഷേ സിഎം ആർ എല്ലിന് ഐ ടി സേവനങ്ങളൊന്നും ലഭിച്ചതായി സൂചനകളുമില്ല. ഇതിന്റെ അടിസ്ഥാനത്തിൽ സീരിയസ് ഫ്രോഡ് ഇൻവെസ്റ്റിഗേഷൻ ഓഫീസ് (എസ്എഫ്ഐഒ) അന്വേഷണം ആരംഭിക്കുകയും പിന്നീട് ഇഡി കള്ളപ്പണം വെളുപ്പിക്കൽ നിരോധന നിയമപ്രകാരം കേസ് രജിസ്റ്റർ ചെയ്യുകയും ചെയ്തു.
കഴിഞ്ഞ ദിവസം ഇഡി ഉദ്യോഗസ്ഥർ വീണയുടെ ബാങ്ക് ലോക്കറുകൾ തുറന്ന് പരിശോധിച്ചിരുന്നു. തിരുവനന്തപുരം ആയുർവേദ കോളേജിന് സമീപമുള്ള എച്ച്ഡിഎഫ്സി ബാങ്കിലെ ലോക്കറാണ് തുറന്നത്. എന്നാൽ മാസപ്പടി കേസുമായി ബന്ധപ്പെട്ട രേഖകളൊന്നും ലോക്കറിൽ നിന്ന് കണ്ടെത്തിയിട്ടില്ലെന്നാണ് സൂചന. പരിശോധനയ്ക്കായി കേന്ദ്ര സേനയുടെ സുരക്ഷയും ഉണ്ടായിരുന്നു. മൂന്ന് മണിക്കൂർ തിരച്ചിൽ തുടർന്നു.
