തിരുവനന്തപുരം: ആർഎംപി നേതാവ് ടിപി ചന്ദ്രശേഖരൻ വധക്കേസിലെ പ്രതി അണ്ണൻ സിജിത്തിൻ്റെ പരോൾ കാലാവധി നീട്ടി. ബന്ധുവിൻ്റെ മരണത്തെ തുടർന്ന് 30 ദിവസത്തേക്കാണ് ജയിൽ ഡിജിപി അടിയന്തര പരോൾ അനുവദിച്ചത്. മുഖ്യമന്ത്രി പിണറായി വിജയനോട് നൽകിയ അപേക്ഷയുടെ അടിസ്ഥാനത്തിലാണ് 15 ദിവസത്തേക്ക് കൂടി പരോൾ നീട്ടാൻ സർക്കാർ ഉത്തരവിട്ടത്.
കേസിലെ മുഖ്യപ്രതി കൊടി സുനിക്ക് പരോൾ അനുവദിച്ചതിനെ കെകെ രമ നേരത്തെ നിയമസഭയിൽ ചോദ്യം ചെയ്തിരുന്നു. കേസുമായി ബന്ധമില്ലെന്ന് 24 മണിക്കൂറും ആണയിടുകയാണ് സർക്കാർ. എന്നിട്ടും പ്രതികളെ ജയിലിൽ അടയ്ക്കാനുള്ള സൗകര്യമില്ലെന്ന് സർക്കാർ പറഞ്ഞുകൊണ്ടേയിരിക്കുന്നു. ടിപി കേസിലെ പ്രതികൾക്ക് മാത്രം എങ്ങനെയാണ് ഇങ്ങനെ പരോൾ ലഭിക്കുന്നതെന്ന് രമ ചോദിച്ചു. ടിപി കേസിലെ പ്രതികൾക്ക് പരോൾ അനുവദിച്ചതിൻ്റെ വിശദാംശങ്ങൾ പങ്കുവെക്കുന്നതിനിടെയായിരുന്നു രമയുടെ ചോദ്യങ്ങൾ.
“കെ.സി. രാമചന്ദ്രൻ എന്ന പ്രതിക്ക് 1308 ദിവസത്തെ പരോൾ ലഭിച്ചു. അണ്ണൻ സിജിത്ത് എന്ന പ്രതിക്ക് 1305 ദിവസത്തെ പരോൾ ലഭിച്ചു. ട്രൗസർ മനോജിന് 1295 ദിവസവും ടി.കെ. രജിഷിന് 1167 ദിവസവുമാണ് പരോൾ,” രമ ചൂണ്ടിക്കാട്ടി. “നിങ്ങൾ പറഞ്ഞത് അവർ നിറവേറ്റിയതുകൊണ്ടാണ് നിങ്ങൾ അവർക്ക് പരോൾ അനുവദിച്ച് അവരെ സംരക്ഷിക്കുന്നത്,” രമ പറഞ്ഞു.
