തൃശൂർ: എരുമപ്പെട്ടിയിൽ വൃദ്ധയെ കടിച്ചു കൊന്ന തെരുവ് നായയെ നാട്ടുകാർ പിടികൂടി അടിച്ചുകൊന്നു. കടങ്ങോട് പഞ്ചായത്ത് അധികൃതർ നിയോഗിച്ച വന്യജീവി സംരക്ഷകനാണ് വെള്ളിയാഴ്ച പുലർച്ചെ 1:30 ഓടെ നായയെ പിടികൂടിയത്. നായയ്ക്ക് പേവിഷബാധയുണ്ടോ എന്ന് നിർണ്ണയിക്കാൻ പരിശോധന നടത്തും.
വ്യാഴാഴ്ച വൈകുന്നേരം 6:30 ഓടെയാണ് കിടപ്പിലായ കാർത്ത്യായനി (84) യെ നായ ക്രൂരമായി കടിച്ചു കൊലപ്പെടുത്തിയത് . ഒപ്പം മുറിയിലുണ്ടായിരുന്ന മാനസിക വെല്ലുവിളി നേരിടുന്ന മകൻ ദേവദാസനെയും നായ കടിച്ചു പരിക്കേൽപ്പിച്ചു. രണ്ട് വർഷം മുമ്പാണ് വീണ് അസ്ഥി ഒടിഞ്ഞതിനെ തുടർന്ന് കാർത്ത്യായനി കിടപ്പിലായത്. കാർത്ത്യായനിയുടെ ഇളയ മകൻ മണികണ്ഠൻ അവർക്ക് ഭക്ഷണവുമായി എത്തിയപ്പോഴാണ് സംഭവം പുറത്തറിഞ്ഞത്.
രക്തത്തിൽ കുളിച്ച് കിടക്കുന്ന കാർത്ത്യായനിയെയും ദേവദാസനെയും ഗുരുതരമായ പരിക്കുകളോടെ കണ്ടെത്തി. ആശുപത്രിയിലേക്ക് കൊണ്ടുപോകാൻ ശ്രമിച്ചെങ്കിലും അപ്പോഴേക്കും കാർത്ത്യായനി മരിച്ചിരുന്നു. പൂട്ടിയിട്ടിട്ടില്ലാത്ത വാതിലിലൂടെ നായ അകത്തുകടന്നതാണെന്നാണ് നാട്ടുകാർ പറയുന്നത്. കാർത്ത്യായനിയുടെ മറ്റൊരു മകൻ സതീഷും സമീപത്തെ വീട്ടിലാണ് താമസിക്കുന്നത് .
