തിരുവനന്തപുരം: കെ.എസ്.ആർ.ടി.സി സ്വന്തമായി പ്രൊഫഷണൽ ഗാനമേള ട്രൂപ്പ് ആരംഭിക്കുന്നു . ഗതാഗത മന്ത്രി കെ.ബി. ഗണേഷ് കുമാറിന്റെ നിർദ്ദേശപ്രകാരമാണ് പുതിയ പദ്ധതി. കെ.എസ്.ആർ.ടി.സി ജീവനക്കാർക്കും അവരുടെ കുടുംബാംഗങ്ങൾക്കും ട്രൂപ്പിൽ അംഗങ്ങളാകാൻ അവസരം ലഭിക്കും. പാട്ടുപാടുന്നതിലും സംഗീതോപകരണങ്ങൾ കൈകാര്യം ചെയ്യുന്നതിലും പ്രാവീണ്യമുള്ളവർക്ക് അംഗങ്ങളാകാൻ അപേക്ഷിക്കാം. അപേക്ഷ സമർപ്പിക്കാനുള്ള അവസാന തീയതി സെപ്റ്റംബർ 29 ആണ്.താൽപ്പര്യമുള്ള ആളുകൾക്ക് അവരുടെ പ്രകടനങ്ങളുടെ വീഡിയോകൾ സഹിതം അപേക്ഷിക്കാം.
വീഡിയോ മൂന്ന് മിനിറ്റിൽ കുറയാത്തതും അഞ്ച് മിനിറ്റിൽ കൂടാത്തതുമായിരിക്കണം. വീഡിയോയുടെ തുടക്കത്തിൽ, പേര്, സ്ഥാനം, ജീവനക്കാരുമായുള്ള ബന്ധം (കുടുംബാംഗമാണെങ്കിൽ), അവർ ജോലി ചെയ്യുന്ന യൂണിറ്റ്, അവരുടെ മൊബൈൽ നമ്പർ എന്നിവ ഉൾപ്പെടുത്തി സ്വയം പരിചയപ്പെടുത്തണം.
വീഡിയോയിൽ നിന്ന് തിരഞ്ഞെടുക്കപ്പെടുന്നവർക്ക് അവരുടെ കഴിവ് തെളിയിക്കാനുള്ള അവസരം ലഭിക്കും. പ്രാവീണ്യം തെളിയിക്കുന്ന സർട്ടിഫിക്കറ്റ് ഉണ്ടെങ്കിൽ, അതും സമർപ്പിക്കണം. യൂണിറ്റ് ഓഫീസർ വഴി എൻട്രികൾ ചീഫ് ഓഫീസിൽ സമർപ്പിക്കണം. ksrtcexpo@gmail.com എന്ന ഇമെയിൽ വിലാസത്തിലോ 9497001474 എന്ന വാട്ട്സ്ആപ്പ് നമ്പറിലോ അപേക്ഷ സമർപ്പിക്കാം.
നിശ്ചിത സമയത്തിന് ശേഷം ലഭിക്കുന്ന എൻട്രികൾ പരിഗണിക്കില്ല. ടൂറിസം യാത്രകളിൽ കെഎസ്ആർടിസി ജീവനക്കാർ പാടുന്ന വീഡിയോകൾ സോഷ്യൽ മീഡിയയിൽ വൈറലായതിനെ തുടർന്നാണ് പുതിയ പരിഷ്കാരം . അടുത്തിടെ കെഎസ്ആർടിസി സ്വന്തമായി ക്രിക്കറ്റ് ടീം ആരംഭിച്ചിരുന്നു.
