തിരുവനന്തപുരം: സംസ്ഥാനത്തെ തദ്ദേശ സ്വയംഭരണ സ്ഥാപനങ്ങളിലേക്കുള്ള ആദ്യഘട്ട വോട്ടെടുപ്പ് അവസാനിച്ചു . വൈകുന്നേരം 6 മണി വരെ 70.28 ശതമാനത്തിലധികം പോളിംഗ് രേഖപ്പെടുത്തി. നിശ്ചിത സമയത്തിനുശേഷം ക്യൂവിൽ നിൽക്കുന്നവർക്ക് വോട്ടുചെയ്യാൻ അനുവാദമുണ്ടാകും. കോർപ്പറേഷനുകളിൽ, കൊല്ലത്താണ് ഏറ്റവും കൂടുതൽ പോളിംഗ് രേഖപ്പെടുത്തിയത്, 62.18 ശതമാനം.ഈരാറ്റുപേട്ട മുനിസിപ്പാലിറ്റിയിൽ 84 ശതമാനം പോളിംഗ് രേഖപ്പെടുത്തി
ഒമ്പത് മണിക്കൂർ പോളിംഗ് കഴിഞ്ഞപ്പോൾ, എറണാകുളം 60 ശതമാനം പോളിംഗുമായി മുന്നിലാണ്. അതേസമയം ഏറ്റവും കുറവ് പത്തനംതിട്ടയിലും തിരുവനന്തപുരത്തുമാണ്. തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിന്റെ ആദ്യ ഘട്ടത്തിൽ ഇന്ന് ഏഴ് ജില്ലകളിലും വോട്ടെടുപ്പ് നടന്നു.
തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകൾ ഇന്ന് വോട്ട് രേഖപ്പെടുത്തി . സിനിമാ-രാഷ്ട്രീയ മേഖലകളിലെ പ്രമുഖർ വോട്ട് രേഖപ്പെടുത്താൻ എത്തിയിരുന്നു . നടൻ ദിലീപും ഭാര്യ കാവ്യ മാധവനും കുടുംബത്തോടൊപ്പം ആലുവയിലെ സെന്റ് ഫ്രാൻസിസ് എൽപി സ്കൂളിൽ വോട്ട് രേഖപ്പെടുത്തി.
ശശി തരൂർ എംപി തിരുവനന്തപുരത്തെ കോട്ടൺ ഹിൽ സ്കൂളിൽ വോട്ട് രേഖപ്പെടുത്തി . തിരുവനന്തപുരം എംപിയോടൊപ്പം വാർഡിലെ കോൺഗ്രസ് സ്ഥാനാർത്ഥിയും ഉണ്ടായിരുന്നു. പാപ്പനംകോട് വാർഡിലെ നീറമൺകര എൻഎസ്എസ് കോളേജിലാണ് മന്ത്രി ജി ആർ അനിൽ വോട്ട് ചെയ്തത്. ഫോർട്ട് വാർഡിലെ ഒന്നാം ബൂത്തിൽ മന്ത്രി ശിവൻകുട്ടിയും ഭാര്യ പാർവതിയും വോട്ട് ചെയ്തു. ഗവർണർ രാജേന്ദ്ര അർലേക്കർ കവടിയാർ ജവഹർ നഗർ സ്കൂളിൽ വോട്ട് ചെയ്തു.
കൊല്ലം കോർപ്പറേഷന്റെ ഭരണിക്കാവ് ഡിവിഷനിലെ ഒന്നാം നമ്പർ ബൂത്തിലെ വോട്ടിംഗ് മെഷീനിൽ സാങ്കേതിക തകരാറുണ്ടായതിനാൽ പോളിംഗ് വൈകിയാണ് ആരംഭിച്ചത്. വണ്ടിപ്പെരിയാർ തങ്കമലയിലെ മെഷീനുകളിലും ഇതേ തകരാർ ഉണ്ടായി . ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ രാവിലെ ജവഹർ നഗറിൽ വോട്ട് ചെയ്യാനെത്തി, കേരളത്തിൽ മാറ്റത്തിന്റെ രാഷ്ട്രീയ കാറ്റ് ഉടൻ ഉണ്ടാകുമെന്നും അദ്ദേഹം പറഞ്ഞു. അതേസമയം, തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിൽ കോൺഗ്രസിന് ചരിത്രപരമായ തിരിച്ചുവരവ് ഉണ്ടാകുമെന്ന് വിഡി സതീശൻ പറഞ്ഞു.
