തിരുവനന്തപുരം ∙ കേരള നിയമസഭാ തിരഞ്ഞെടുപ്പ് ഏപ്രിൽ 9ന്. മേയ് 4ന് വോട്ടെണ്ണൽ. പുതുച്ചേരി, അസം തിരഞ്ഞെടുപ്പ് കേരളത്തിനൊപ്പം നടക്കും. തമിഴ്നാട്ടിൽ ഏപ്രിൽ 23 , ബംഗാളിൽ ഏപ്രിൽ 23, ഏപ്രിൽ 29 എന്നിങ്ങനെയാണ് തെരഞ്ഞെടുപ്പ്. മേയ് 4നാണ് എല്ലാ സംസ്ഥാനങ്ങളിലേയും വോട്ടെണ്ണൽ.കേരളം വിധിയെഴുതാൻ ഇനി വെറും 24 ദിവസങ്ങൾ മാത്രമാണുള്ളത് .ഡൽഹിയിലെ വിജ്ഞാൻ ഭവനിൽ നടന്ന തിരഞ്ഞെടുപ്പ് കമ്മീഷന്റെ പത്രസമ്മേളനത്തിൽ മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ, തിരഞ്ഞെടുപ്പ് കമ്മീഷണർമാരായ സുഖ്ബീർ സിംഗ് സന്ധു, വിവേക് ജോഷി എന്നിവർ പങ്കെടുത്തു.
പശ്ചിമ ബംഗാളിൽ വോട്ടെടുപ്പ് കഴിഞ്ഞ തവണ എട്ട് ഘട്ടങ്ങളിലായിരുന്നുവെങ്കിൽ, വരാനിരിക്കുന്ന നിയമസഭാ തിരഞ്ഞെടുപ്പ് രണ്ട് ഘട്ടങ്ങളിലായാണ് നടക്കുക. അസം, തമിഴ്നാട്, പുതുച്ചേരി എന്നിവിടങ്ങളിൽ ഒറ്റ ഘട്ടമായാണ് വോട്ടെടുപ്പ് നടക്കുക . അഞ്ച് സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി ആകെ 174 ദശലക്ഷം വോട്ടർമാരുണ്ടെന്നും ആകെ 824 സീറ്റുകളുണ്ടെന്നും മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ പറഞ്ഞു. പോളിംഗ് സ്റ്റേഷനുകൾക്കുള്ളിൽ മൊബൈൽ ഫോണുകൾ അനുവദിക്കില്ലെന്നും അവ പുറത്ത് സൂക്ഷിക്കണമെന്നും മുഖ്യ തിരഞ്ഞെടുപ്പ് കമ്മീഷണർ പ്രസ്താവിച്ചു.
നാല് സംസ്ഥാനങ്ങളിലെയും ഒരു കേന്ദ്രഭരണ പ്രദേശത്തെയും 2.19 ലക്ഷം പോളിംഗ് സ്റ്റേഷനുകളിലാണ് വോട്ടെടുപ്പ് നടക്കുകയെന്നും അവിടെ 2.5 ദശലക്ഷം തിരഞ്ഞെടുപ്പ് ഉദ്യോഗസ്ഥരെ വിന്യസിക്കുമെന്നും മുഖ്യ തിരഞ്ഞെടുപ്പ് കമ്മീഷണർ പറഞ്ഞു.
അസം, കേരളം, പുതുച്ചേരി, തമിഴ്നാട്, പശ്ചിമ ബംഗാൾ എന്നിവിടങ്ങളിലെ ഓരോ പോളിംഗ് സ്റ്റേഷനിലും ശരാശരി വോട്ടർമാരുടെ എണ്ണം 750-900 ആണ് . എല്ലാ പോളിംഗ് സ്റ്റേഷനുകളിലും വിന്യസിച്ചിരിക്കുന്ന പ്രിസൈഡിംഗ് ഓഫീസർമാർ ഓരോ രണ്ട് മണിക്കൂറിലും വോട്ടിംഗ് ശതമാനം അപ്ലോഡ് ചെയ്യുമെന്നും വോട്ടിംഗ് ഡാറ്റ തിരഞ്ഞെടുപ്പ് അവസാനിച്ച ഉടൻ അപ്ലോഡ് ചെയ്യുമെന്നും അദ്ദേഹം പറഞ്ഞു.
അതേസമയം തീയതി പ്രഖ്യാപിച്ചതിനു പിന്നാലെ നിയമസഭാ തിരഞ്ഞെടുപ്പിലേക്കുള്ള സിപിഎം സ്ഥാനാർഥിപട്ടിക പ്രഖ്യാപിച്ച് സംസ്ഥാന സെക്രട്ടറി എം.വി. ഗോവിന്ദൻ. ഒരു പൊതുസ്വതന്ത്രൻ ഉൾപ്പെടെ 86 സീറ്റിൽ സിപിഎം മത്സരിക്കും. 56 എംഎൽഎമാർ ഇക്കുറി മത്സരരംഗത്തുണ്ട്. നിലവിലെ എംഎൽഎമാരിൽ രണ്ടു പേർക്കാണ് സീറ്റില്ലാത്തത്. എം.എം. മണിക്കും എ.എൻ. ഷംസീറിനും. ഉടുമ്പഞ്ചോലയിൽ എം.എം. മണിക്കു പകരം കെ.കെ. ജയചന്ദ്രൻ മത്സരിക്കും. സ്പീക്കർ എ.എൻ. ഷംസീറിനു പകരം തലശേരിയിൽ കാരായി രാജനാണ് മത്സരിക്കുക.
സിപിഎം 86 സീറ്റുകളിൽ മത്സരിക്കും. 56 എംഎൽഎമാർ മത്സരരംഗത്തുണ്ട്. ധര്മടത്ത് പിണറായിയും പേരാവൂരിൽ കെ.കെ.ശൈലജയും മത്സരിക്കും.
