തിരുവനന്തപുരം: മാസപ്പടി കേസിൽ വീണ വിജയന്റെ ബാങ്ക് ലോക്കറിൽ എൻഫോഴ്സ്മെന്റ് ഡയറക്ടറേറ്റ് പരിശോധന നടത്തുന്നു. തിരുവനന്തപുരം ആയുർവേദ കോളേജിലെ എച്ച്ഡിഎഫ്സി ബാങ്കിലാണ് പരിശോധന നടക്കുന്നത്. കഴിഞ്ഞ ദിവസം ചോദ്യം ചെയ്യുന്നതിനിടെ വീണ ബാങ്ക് നിക്ഷേപങ്ങളുമായി ബന്ധപ്പെട്ട രേഖകൾ ഇഡി ഉദ്യോഗസ്ഥർക്ക് നൽകിയിരുന്നു. ഇതിന്റെ അടിസ്ഥാനത്തിലാണ് ലോക്കറിൽ പരിശോധന നടത്തുന്നത്. കേന്ദ്ര സേനയുടെ സാന്നിധ്യത്തിലാണ് പരിശോധന.
ഒമ്പത് മണിക്കൂർ ചോദ്യം ചെയ്യലിന് ശേഷമാണ് ഇന്നലെ വീണയെ വിട്ടയച്ചത്. രാവിലെ 11 മണിക്ക് ആരംഭിച്ച ചോദ്യം ചെയ്യൽ വൈകുന്നേരം 6 മണിക്ക് അവസാനിച്ചു. മൂന്ന് തവണ ഇടവേളകൾ നൽകി. രേഖപ്പെടുത്തിയ മറുപടികൾ വായിച്ച് നടപടിക്രമങ്ങൾ പൂർത്തിയാക്കിയ ശേഷം, വൈകുന്നേരം 7.52 ന് വീണ പുറത്തിറങ്ങി.
സോഫ്റ്റ്വെയർ മെയിന്റനൻസ് സേവനങ്ങൾ നൽകിയതിന് സിഎംആർഎല്ലിൽ നിന്ന് 2.78 കോടി രൂപ ലഭിച്ചതായി വീണ മറുപടി നൽകിയതായി സൂചനയുണ്ട്. കമ്പനി അടച്ചുപൂട്ടിയതിനുശേഷം സേവനങ്ങളുടെ വിശദാംശങ്ങളോ തെളിവുകളോ തന്റെ പക്കലില്ലെന്നും അവർ പറഞ്ഞു.
വിവിധ ബാങ്ക് അക്കൗണ്ടുകളിലേക്ക് ക്രെഡിറ്റ് ചെയ്ത ഫണ്ടുകളുടെ ഉറവിടങ്ങളെക്കുറിച്ചും പണം എങ്ങനെ ചെലവഴിച്ചു എന്നതിനെക്കുറിച്ചും ഇഡി വിശദമായ വിശദീകരണങ്ങൾ തേടി. പരിശോധനയ്ക്ക് വിധേയമായ നിരവധി ഇടപാടുകൾക്ക് വ്യക്തമായ ഉത്തരങ്ങൾ ലഭിച്ചിട്ടില്ലെന്ന് റിപ്പോർട്ടുകൾ പറയുന്നു. രണ്ടാമത്തെ സമൻസിനു മറുപടിയായാണ് അവർ ഇഡിക്ക് മുന്നിൽ ഹാജരായത്.
