ന്യൂഡൽഹി : മുംബൈ ആക്രമണം, പഹൽഗാം ഭീകരാക്രമണം, ഡൽഹി സ്ഫോടനം എന്നിവയിൽ കൊല്ലപ്പെട്ടവർക്ക് ആദരാഞ്ജലി അർപ്പിച്ച് നടൻ ഷാരൂഖ് ഖാൻ . ശനിയാഴ്ച നടന്ന ഗ്ലോബൽ പീസ് ഓണേഴ്സ് 2025 പരിപാടിയിൽ പങ്കെടുക്കുകയായിരുന്നു ഷാരൂഖ് ഖാൻ .
ആക്രമണത്തിൽ കൊല്ലപ്പെട്ടവരുടെ കുടുംബാംഗങ്ങൾ, അതിജീവിച്ചവർ, നേതാക്കൾ, വിശിഷ്ട വ്യക്തികൾ, കലാകാരന്മാർ എന്നിവരുടെ കൂട്ടായ അനുസ്മരണ ചടങ്ങാണ് സംഘടിപ്പിച്ചത് . ദിവ്യജ് ഫൗണ്ടേഷനാണ് പരിപാടി സംഘടിപ്പിച്ചത്. അമൃത ഫഡ്നാവിസിന്റെ നേതൃത്വത്തിലായിരുന്നു ഇത്.
“26/11 ഭീകരാക്രമണത്തിലും, പഹൽഗാം ഭീകരാക്രമണത്തിലും, സമീപകാല ഡൽഹി സ്ഫോടനങ്ങളിലും ജീവൻ നഷ്ടപ്പെട്ട നിരപരാധികൾക്കും, ഈ ആക്രമണങ്ങളിൽ വീരമൃത്യു വരിച്ച നമ്മുടെ ധീരരായ സുരക്ഷാ ഉദ്യോഗസ്ഥർക്കും എന്റെ ആദരാഞ്ജലി. ഇന്ന്, രാജ്യത്തെ ധീരരായ സൈനികർക്കും ജവാൻമാർക്കും വേണ്ടി നാല് മനോഹരമായ വരികൾ പറയാൻ എന്നോട് ആവശ്യപ്പെട്ടു. നിങ്ങൾ എന്താണ് ചെയ്യുന്നതെന്ന് ആരെങ്കിലും നിങ്ങളോട് ചോദിച്ചാൽ, ഞാൻ രാജ്യത്തെ സംരക്ഷിക്കുന്നുവെന്ന് അഭിമാനത്തോടെ പറയുക.
നിങ്ങൾ എത്ര സമ്പാദിക്കുന്നുവെന്ന് ആരെങ്കിലും നിങ്ങളോട് ചോദിച്ചാൽ, ചെറുതായി പുഞ്ചിരിച്ചുകൊണ്ട് പറയുക, 1.4 ബില്യൺ ജനങ്ങളുടെ അനുഗ്രഹം ഞാൻ നേടുന്നു. അവർ തിരിഞ്ഞു നിന്ന് നിങ്ങൾ ഒരിക്കലും ഭയപ്പെടുന്നില്ലേ? എന്ന് വീണ്ടും ചോദിച്ചാൽ, അവരുടെ കണ്ണുകളിൽ നോക്കി, നമ്മളെ ആക്രമിക്കുന്നവർ ഭയപ്പെടും എന്ന് പറയുക .
നമുക്കെല്ലാവർക്കും ഒരുമിച്ച് സമാധാനത്തിലേക്ക് ചുവടുവെക്കാം. നമ്മുടെ ചുറ്റുമുള്ള ജാതി, മതം, വിവേചനം എന്നിവ മറന്ന് മനുഷ്യത്വത്തിന്റെ പാതയിലൂടെ നടക്കാം, അങ്ങനെ നമ്മുടെ രാജ്യത്തിന്റെ സമാധാനത്തിനായി നമ്മുടെ വീരന്മാരുടെ രക്തസാക്ഷിത്വം വെറുതെയാകില്ല. നമ്മൾക്കിടയിൽ സമാധാനമുണ്ടെങ്കിൽ, ഒരുമയുണ്ടെങ്കിൽ ഒന്നിനും ഇന്ത്യയെ തകർക്കാനാവില്ല, ഒന്നിനും ഇന്ത്യയെ പരാജയപ്പെടുത്താനാവില്ല, നമ്മുടെ ഇന്ത്യക്കാരുടെ ആത്മാവിനെ തകർക്കാൻ ഒന്നിനും കഴിയില്ല,” അദ്ദേഹം പറഞ്ഞു.
