ന്യൂഡൽഹി ; സമാധാനം നിലനിർത്താൻ 10,000 രൂപയുടെ വ്യക്തിഗത ബോണ്ട് നൽകണമെന്ന നോട്ടീസിനെതിരെ ഐസ പ്രസിഡന്റ് നേഹ ബോറ സമർപ്പിച്ച ഹർജി ഡൽഹി ഹൈക്കോടതി തള്ളി. സ്പെഷ്യൽ എക്സിക്യൂട്ടീവ് മജിസ്ട്രേറ്റ് നൽകിയ നോട്ടീസിനെതിരെയാണ് നേഹ ബോറ ഹൈക്കോടതിയിലെത്തിയത്.
നടപടികളുടെ എല്ലാ രേഖകളും വിവരങ്ങളും നേഹ ബോറയ്ക്ക് നൽകണമെന്ന് കോടതി നിർദ്ദേശിച്ചു. കൂടാതെ, ഭാരതീയ നാഗരിക് സുരക്ഷാ സംഹിത (BNSS)-യിലെ സെക്ഷൻ 135-ന്റെ പരിധിയും പ്രത്യാഘാതങ്ങളും പരിശോധിക്കാനും കോടതി മജിസ്ട്രേറ്റിനോട് ആവശ്യപ്പെട്ടു. പ്രത്യേകിച്ച്, അന്വേഷണത്തിന്റെ തുടക്കത്തിൽ തന്നെ ബോറയോട് ബോണ്ട് ആവശ്യപ്പെടാമോ, അതോ തുടർന്നുണ്ടാകുന്ന സംഭവങ്ങൾ സമാധാനത്തിന് ഭീഷണിയാണെന്ന് സൂചിപ്പിക്കുകയാണെങ്കിൽ മാത്രം ബോണ്ട് ആവശ്യപ്പെട്ടാൽ മതിയോ തുടങ്ങിയ കാര്യങ്ങളും ഉറപ്പ് വരുത്തണമെന്നാണ് കോടതി പറയുന്നത്.
പ്രതിരോധ നടപടികളുമായി ബന്ധപ്പെട്ട കാര്യങ്ങളാണ് ഭാരതീയ നാഗരിക് സുരക്ഷാ സംഹിത (BNSS)-യിലെ സെക്ഷൻ 135-ൽ പറയുന്നത് . അടിയന്തര പ്രതിരോധ നടപടികൾ ആവശ്യമാണെന്ന് കരുതുന്ന സാഹചര്യങ്ങളിൽ, അന്വേഷണ വേളയിൽ ബോണ്ട് ഹാജരാക്കാൻ മജിസ്ട്രേറ്റിന് ആവശ്യപ്പെടാമെന്നും ഇതിൽ വ്യവസ്ഥയുണ്ട്.
അതുകൊണ്ട് തന്നെ നേഹ ബോറയുടെ ഹർജി നിലനിൽക്കുന്നതല്ലെന്ന് വ്യക്തമാക്കി ഡൽഹി പോലീസ് ഇതിനെ എതിർത്തു. അഭിഭാഷകൻ അഭിക് ചിമ്നി തയ്യാറാക്കിയ ഹർജിയിൽ, നേഹ സമാധാനം ലംഘിക്കാൻ സാധ്യതയുണ്ടെന്ന വാദത്തെ പിന്തുണയ്ക്കുന്ന തെളിവുകളൊന്നും നോട്ടീസിൽ ഇല്ലെന്നാണ് പറയുന്നത് .
ഒക്ടോബർ 16-ന് ഡൽഹിയിൽ നടന്ന ‘ലെഹ്‌രാ ദോ തിരംഗ’ മാർച്ചിൽ പങ്കെടുത്തതിനെത്തുടർന്നാണ് നേഹ ബോറയെ കരുതൽ തടങ്കലിൽ വെച്ചത് . ഇതിനു പിന്നാലെ, ഒക്ടോബർ 17-നാണ് പീസ് ബോണ്ടുമായി ബന്ധപ്പെട്ട നോട്ടീസ് നൽകിയത്.
