കൊൽക്കത്ത ; ബംഗാളിൽ അരാജകത്വഭരണം അവസാനിപ്പിക്കുമെന്ന് പ്രധാനമന്ത്രി നരേന്ദ്രമോദി. ഇത്തവണ തൃണമൂൽ കോൺഗ്രസ് അധികാരത്തിൽ നിന്ന് പുറത്താകുമെന്നും , അതിനുള്ള ഉദാഹരണമാണ് റാലിയ്ക്കെത്തിയ വമ്പൻ ജനക്കൂട്ടമെന്നും അദ്ദേഹം പറഞ്ഞു.
സിലിഗുരി ജില്ലയിൽ പൊതു റാലിയെ അഭിസംബോധന ചെയ്ത് സംസാരിക്കുകയായിരുന്നു മോദി. ‘ ഇത്തവണ ടിഎംസി പുറത്താകുമെന്നത് ഉറപ്പാണ്. വടക്കൻ ബംഗാൾ വിരുദ്ധ, ആദിവാസി വിരുദ്ധ, തേയിലത്തോട്ട തൊഴിലാളികളെ എതിർക്കുന്ന, സ്ത്രീകൾക്കും യുവാക്കൾക്കും എതിരായ ഒരു പാർട്ടിയാണിന്ന് ടിഎം സി .
ഇന്ന് ഇവിടെ കാണുന്ന ജനതരംഗം ടിഎംസിക്ക് ഉറക്കമില്ലാത്ത രാത്രികൾ നൽകുമെന്ന് എനിക്ക് ഉറപ്പുണ്ട്. സിലിഗുരിയിലെ ഈ റാലി ടിഎംസിയുടെ ‘മഹാജംഗൽരാജ്’ (അരാജകത്വത്തിന്റെ വാഴ്ച) മതിൽ തകർക്കുമെന്ന് നിങ്ങൾ ദൃഢനിശ്ചയം ചെയ്തു. ബംഗാൾ മുഴുവൻ, ഒരു മുദ്രാവാക്യം മാത്രമേ മുഴങ്ങുന്നുള്ളൂ. കഴിഞ്ഞ 15 വർഷമായി ടിഎംസി സർക്കാർ ബംഗാളിനെ നശിപ്പിച്ചു . സൃഷ്ടിപരമായ പ്രവർത്തനങ്ങൾ ചെയ്യുന്നതിനുപകരം, അവർ ദുഷ്പ്രവൃത്തികളിൽ ഏർപ്പെട്ടിരിക്കുകയാണ്.
വടക്കൻ ബംഗാളിനെയും ദേശീയ സുരക്ഷയെയും സംബന്ധിച്ച ടിഎംസിയുടെ തെറ്റായ നയങ്ങളെക്കുറിച്ചുള്ള മറ്റൊരു തെളിവും ഞാൻ നൽകാം. രാജ്യത്ത് ഒരു ‘തുക്ഡെ-തുക്ഡെ ഗാങ്ങ്’ നിലവിലുണ്ട്. ഈ സംഘം… സിലിഗുരി ഇടനാഴി വിച്ഛേദിക്കുമെന്ന് ഭീഷണിപ്പെടുത്തിയിരുന്നു. വടക്കുകിഴക്കൻ മേഖലയെ രാജ്യത്തിന്റെ മറ്റ് ഭാഗങ്ങളിൽ നിന്ന് വേർതിരിക്കുന്നതിനെക്കുറിച്ച് അവർ സംസാരിച്ചിരുന്നു. പ്രീണന രാഷ്ട്രീയത്തിൽ മുഴുകിയിരിക്കുന്ന ടിഎംസി – തെരുവുകൾ മുതൽ പാർലമെന്റ് വരെ അത്തരം വ്യക്തികൾക്ക് പിന്തുണ നൽകുന്നു. ഇതാണ് ടിഎംസിയുടെ യഥാർത്ഥ മുഖം.
15 വർഷമായി ടിഎംസി ഇവിടെ അധികാരത്തിൽ തുടരാൻ കാരണം അവർ ഭയത്തിന്റെ ഒരു സാമ്രാജ്യം സ്ഥാപിച്ചു എന്നതാണ്. ഈ ഭയം ഇല്ലാതാക്കുകയും ബംഗാളിൽ വിശ്വാസം പുനഃസ്ഥാപിക്കുകയും വേണം. ബിജെപിക്ക് മാത്രമേ ഈ ദൗത്യം നിറവേറ്റാൻ കഴിയൂ. നുഴഞ്ഞുകയറ്റവും അഴിമതിയും ഇല്ലാതാക്കുമെന്ന് മോദി ബംഗാളിന് ഉറപ്പ് നൽകുന്നു “ പ്രധാനമന്ത്രി പറഞ്ഞു.
