തിരുവനന്തപുരം: പ്ലാനിംഗ് ബോർഡ് പരീക്ഷാ ക്രമക്കേടുകളുമായി ബന്ധപ്പെട്ട വിവരങ്ങൾ നൽകാത്തതിന് പി‌എസ്‌സി ഇൻഫർമേഷൻ ഓഫീസർക്കെതിരെ കർശന നടപടി സ്വീകരിക്കുമെന്ന് വിവരാവകാശ കമ്മീഷൻ . പരീക്ഷ എഴുതിയ ഉദ്യോഗാർത്ഥിക്ക് അവരുടെ ഉത്തരക്കടലാസുകളുടെ പകർപ്പുകളും അഭിമുഖത്തിൽ ലഭിച്ച മാർക്കും നിഷേധിക്കുന്നത് തികച്ചും നിരുത്തരവാദപരമാണെന്ന് വിവരാവകാശ കമ്മീഷൻ നോട്ടീസിലൂടെ അറിയിച്ചു.
വിവരങ്ങൾ നൽകാനുള്ള ഉത്തരവ് മനഃപൂർവ്വം തടസ്സപ്പെടുത്തുകയാണെന്നും അത് വിവരാവകാശ (ആർടിഐ) നിയമത്തെ വെല്ലുവിളിക്കുന്നതിന് തുല്യമാണെന്നും കമ്മീഷൻ കുറ്റപ്പെടുത്തി. ഉദ്യോഗസ്ഥന്റെ ഭാഗത്തുനിന്നുള്ള വീഴ്ച ഗൗരവമുള്ളതായി കണക്കാക്കുന്നുണ്ടെങ്കിലും, വീണ്ടും അവസരം നൽകുന്നതായും വിവരാവകാശ കമ്മീഷൻ പറഞ്ഞു. ഓഗസ്റ്റ് 10 നകം ഉദ്യോഗാർത്ഥിക്ക് ആവശ്യപ്പെട്ട എല്ലാ വിവരങ്ങളും നൽകി റിപ്പോർട്ട് സമർപ്പിക്കുക എന്നതാണ് പി‌എസ്‌സിക്ക് നൽകിയ കർശന നിർദ്ദേശം.
