പത്തനംതിട്ട: ശബരിമല തന്ത്രി സ്ഥാനത്ത് നിന്ന് തന്നെ മാറ്റണമെന്ന് ആവശ്യപ്പെട്ട് തന്ത്രി കണ്ഠരര് രാജീവര് ദേവസ്വം ബോർഡിന് കത്തെഴുതിയതായി റിപ്പോർട്ട്. അനാരോഗ്യം ചൂണ്ടിക്കാട്ടിയാണ് അദ്ദേഹം ഈ ആവശ്യം ഉന്നയിച്ചത്. ശബരിമല സ്വർണ്ണ മോഷണക്കേസിലെ പ്രതി സ്ഥാനത്തുള്ളയാളാണ് കണ്ഠരര് രാജീവര്. എന്നാൽ, കത്തിൽ സ്വർണ്ണ കൊള്ള കേസിനെക്കുറിച്ച് പരാമർശമില്ല. റൊട്ടേഷൻ സമ്പ്രദായം അനുസരിച്ച്, ഈ വർഷം, കണ്ഠരര് രാജീവര് ശബരിമലയിൽ ആചാരങ്ങൾ നിർവഹിക്കണം. എന്നാൽ കത്തിൽ രാജീവര് തന്റെ മകൻ ബ്രഹ്മദത്തന് ചുമതല നൽകണമെന്ന് ആവശ്യപ്പെട്ടിരിക്കുന്നത്.
ദേവസ്വം ബോർഡ് ഇതുവരെ ഇക്കാര്യത്തിൽ തീരുമാനമെടുത്തിട്ടില്ല. ശബരിമല സ്വർണ്ണ മോഷണ കേസിൽ തന്ത്രിയുടെ അറസ്റ്റിന്റെ പശ്ചാത്തലത്തിൽ, ഹൈക്കോടതിയുടെ നിർദ്ദേശപ്രകാരം മാത്രമേ ദേവസ്വം ബോർഡ് തീരുമാനമെടുക്കൂ. സ്വർണ്ണ മോഷണ കേസിൽ തന്ത്രി കണ്ഠരര് രാജീവരെ നേരത്തെ പ്രത്യേക അന്വേഷണ സംഘം അറസ്റ്റ് ചെയ്തിരുന്നു.
സ്വർണ്ണ മോഷണ കേസിലെ മുഖ്യപ്രതിയായ ഉണ്ണികൃഷ്ണൻ പോറ്റിയെ ശബരിമലയിലേക്ക് കൊണ്ടുവന്നത് തന്ത്രിയാണെന്ന് അന്വേഷണ സംഘം കണ്ടെത്തിയിരുന്നു. ഉണ്ണികൃഷ്ണൻ പോറ്റിക്ക് ക്ഷേത്രത്തിൽ സ്വാധീനം നൽകിയത് തന്ത്രിയാണെന്ന് ശബരിമലയിലെ ജീവനക്കാരും മൊഴി നൽകിയിരുന്നു.
