തിരുവനന്തപുരം : പിതൃസ്മരണയിൽ ബലിതർപ്പണം നടത്തി ആയിരങ്ങൾ . സംസ്ഥാനത്തുട നീളമുള്ള വിവിധ ബലി തർപ്പണ കേന്ദ്രങ്ങളിൽ പുലർച്ചെ മുതൽ തന്നെ വൻ തിരക്കാണ് അനുഭവപ്പെടുന്നത്. ആലുവ മണപ്പുറം, തിരുവല്ലം, തിരുനാവായ, വർക്കല പാപനാശം തുടങ്ങിയ പ്രമുഖ കേന്ദ്രങ്ങളിൽ മരിച്ചുപോയ പ്രിയപ്പെട്ടവരുടെ സ്മരണയിൽ ബലി അർപ്പിക്കാൻ ആയിരക്കണക്കിന് ആളുകൾ എത്തി.
വലിയ ജനക്കൂട്ടം കണക്കിലെടുത്ത്, എല്ലാ പ്രധാന ബലി തർപ്പണ കേന്ദ്രങ്ങളിലും വിപുലമായ ക്രമീകരണങ്ങൾ ഒരുക്കിയിരുന്നു. പെരിയാറിന്റെ തീരത്ത് സജ്ജീകരിച്ചിരിക്കുന്ന 40 താൽക്കാലിക ബലി തർപ്പണ സ്ഥലങ്ങളും പുലർച്ചെ മുതൽ ചടങ്ങുകൾ ആരംഭിച്ചു. മെട്രോ സർവീസുകളും ഇന്നലെ അർദ്ധരാത്രി മുതൽ ആരംഭിച്ചു. കഴിഞ്ഞ രണ്ട് ദിവസമായി മഴ പെയ്യാതിരുന്നതിനാൽ ആലുവ മണപ്പുറത്ത് ചെളി അടിഞ്ഞുകൂടിയിരുന്നില്ല . ഇതും തർപ്പണം നിർവഹിക്കാൻ എത്തുന്നവർക്ക് എളുപ്പമായി.
വെള്ളത്തിലിറങ്ങുന്ന ഭക്തർ സുരക്ഷാ മാർഗ്ഗനിർദ്ദേശങ്ങൾ പാലിക്കണമെന്ന് അധികൃതർ കർശന നിർദ്ദേശം നൽകിയിട്ടുണ്ട്. എല്ലാ കേന്ദ്രങ്ങളിലും പോലീസ് സുരക്ഷയും ഗതാഗത നിയന്ത്രണ ക്രമീകരണങ്ങളും ഏർപ്പെടുത്തിയിട്ടുണ്ട്. ആചാരങ്ങൾ നിർവഹിക്കാൻ എത്തുന്നവരെ സഹായിക്കുന്നതിന് വിവിധ സ്ഥലങ്ങളിൽ അധിക ജീവനക്കാരെയും വിന്യസിച്ചിട്ടുണ്ട്.
