ന്യൂഡൽഹി : ഇറാന്റെ ദേശീയ സുരക്ഷാ കൗൺസിൽ സെക്രട്ടറി മൊഹ്‌സെൻ റെസായിയുമായി ഫോണിൽ സംസാരിച്ച് ദേശീയ സുരക്ഷാ ഉപദേഷ്ടാവ് അജിത് ഡോവൽ . പശ്ചിമേഷ്യയിലെ നിലവിലെ സുരക്ഷാ സാഹചര്യത്തെക്കുറിച്ച് റെസായിയുമായി ഡോവൽ ചർച്ച ചെയ്തതായാണ് റിപ്പോർട്ടുകൾ . പ്രാദേശിക, അന്തർദേശീയ സംഭവവികാസങ്ങളെക്കുറിച്ചും ഇരു രാജ്യങ്ങൾക്കും പരസ്പര താൽപ്പര്യമുള്ള വിഷയങ്ങളെക്കുറിച്ചും ഇരുവരും ചർച്ച ചെയ്തു.
ഇന്ത്യയിലെ ഇറാനിയൻ എംബസിയാണ് സോഷ്യൽ മീഡിയ പോസ്റ്റിലൂടെയാണ് ഇക്കാര്യം വെളിപ്പെടുത്തിയത് . പ്രാദേശിക, അന്തർദേശീയ സംഭവവികാസങ്ങളും പരസ്പര താൽപ്പര്യമുള്ള വിഷയങ്ങളും ഇരുവരും ചർച്ച ചെയ്തതായി എംബസി അറിയിച്ചു. കേന്ദ്ര സർക്കാർ ഇതിനെ പറ്റി ഔദ്യോഗിക പ്രസ്താവനയൊന്നും പുറത്തിറക്കിയിട്ടില്ല.
സൗദി അറേബ്യയ്‌ക്കെതിരായ സമീപകാല ആക്രമണങ്ങളും, പ്രത്യേകിച്ച് സൗദി വിമാനത്താവളങ്ങൾക്ക് നേരെയുണ്ടായ ആക്രമണവും ചർച്ച ചെയ്യപ്പെട്ടതായി സൂചനയുണ്ട് . ഈ ആക്രമണത്തിൽ ഒരു ഇന്ത്യക്കാരൻ മരിക്കുകയും സൗദി അറേബ്യയിലെ റിയാദ് അന്താരാഷ്ട്ര വിമാനത്താവളത്തിൽ നടന്ന ആക്രമണത്തിൽ 12 പേർ കൊല്ലപ്പെടുകയും 300 പേർക്ക് പരിക്കേൽക്കുകയും ചെയ്തു. ഈ ആക്രമണത്തെ ഇന്ത്യ ശക്തമായി അപലപിച്ചു. സൗദി അറേബ്യയിൽ സാധാരണക്കാർക്കും സിവിലിയൻ അടിസ്ഥാന സൗകര്യങ്ങൾക്കും നേരെയുള്ള ആവർത്തിച്ചുള്ള ആക്രമണങ്ങൾ പൂർണ്ണമായും അസ്വീകാര്യമാണെന്നും ഇന്ത്യ വ്യക്തമാക്കി.
പശ്ചിമേഷ്യൻ പ്രതിസന്ധിക്ക് സംഭാഷണത്തിലൂടെയും നയതന്ത്രത്തിലൂടെയും പരിഹാരം കാണണമെന്ന് ഇന്ത്യ നിരന്തരം ആവശ്യപ്പെട്ടിട്ടുണ്ട്. ഒമാൻ ഉൾക്കടലിലും ഹോർമുസ് കടലിടുക്കിലും വ്യാപാര കപ്പലുകൾക്ക് നേരെയുള്ള ആക്രമണങ്ങളെക്കുറിച്ചും ഇന്ത്യ ആശങ്കാകുലരാണ്. ഇവ ഇന്ത്യൻ നാവികരുടെ സുരക്ഷയ്ക്കും ഭീഷണിയാണ്. ഞായറാഴ്ച ഹോർമുസ് കടലിടുക്കിൽ വെച്ച് എംടി പെട്രോ ഡോൾഫിൻ എന്ന വാണിജ്യ കപ്പലിന് നേരെ ആക്രമണം ഉണ്ടായി. പതിനൊന്ന് ഇന്ത്യൻ ക്രൂ അംഗങ്ങൾ കപ്പലിലുണ്ടായിരുന്നു. ഇവരിൽ രണ്ടുപേരെ കാണാതായതായാണ് റിപ്പോർട്ട്.
