കോഴിക്കോട് : താമരശ്ശേരിയിൽ വിദ്യാർത്ഥികൾ തമ്മിലുള്ള സംഘർഷത്തിൽ ഗുരുതരമായി പരിക്കേറ്റ പത്താം ക്ലാസ് വിദ്യാർത്ഥി മരിച്ചു. വട്ടോളി എംജെ ഹയർ സെക്കൻഡറി സ്കൂളിലെ വിദ്യാർത്ഥിയായ മുഹമ്മദ് ഷഹബാസ് (16) ആണ് മരിച്ചത് . ആന്തരിക രക്തസ്രാവത്തെ തുടർന്ന് കോഴിക്കോട് സർക്കാർ മെഡിക്കൽ കോളേജ് ആശുപത്രിയിൽ ചികിത്സയിലായിരുന്നു . താമരശ്ശേരിക്കടുത്തുള്ള ചുങ്കം സ്വദേശിയായ പാലോറക്കുന്ന് ഇക്ബാലിന്റെയും റംസീനയുടെയും മൂത്ത മകനാണ് ഷഹബാസ്.
സംഭവത്തിൽ വകുപ്പുതല അന്വേഷണം ആരംഭിക്കാൻ പൊതുവിദ്യാഭ്യാസ മന്ത്രി വി ശിവൻകുട്ടി പൊതുവിദ്യാഭ്യാസ ഡയറക്ടറോട് നിർദ്ദേശിച്ചു. പോലീസ് അന്വേഷണം പുരോഗമിക്കുകയാണ്, വെള്ളിയാഴ്ച അഞ്ച് വിദ്യാർത്ഥികളെ കസ്റ്റഡിയിലെടുത്തു. കോഴിക്കോട് വിദ്യാഭ്യാസ ഡെപ്യൂട്ടി ഡയറക്ടർ പ്രാഥമിക റിപ്പോർട്ട് സമർപ്പിച്ചതായി ശനിയാഴ്ച പുറത്തിറക്കിയ പ്രസ്താവനയിൽ ശിവൻകുട്ടി പറഞ്ഞു.
വ്യാഴാഴ്ച വൈകുന്നേരം താമരശ്ശേരി ഗവൺമെന്റ് ഹയർ സെക്കൻഡറി സ്കൂളിലെയും എംജെ ഹയർ സെക്കൻഡറി സ്കൂളിലെയും വിദ്യാർത്ഥികൾ തമ്മിൽ ജംഗ്ഷനിൽ വെച്ചാണ് സംഘർഷം ഉണ്ടായത്. ഞായറാഴ്ച ട്യൂഷൻ സെന്ററിൽ നടന്ന യാത്രയയപ്പ് പാർട്ടിയിൽ നിന്നുള്ള പ്രശ്നമാണ് സംഘർഷത്തിനു കാരണമെന്നാണ് സൂചന.
യാത്രയയപ്പ് ചടങ്ങില്‍ അവതരിപ്പിച്ച നൃത്തത്തിനിടെ പാട്ട് നിന്നുപോയതോടെയാണ് പ്രശ്നങ്ങള്‍ തുടങ്ങിയത്. പരിഹസിച്ച് ഒരു വിഭാഗം കുട്ടികള്‍ കൂവിവിളിച്ചു . നൃത്തം ചെയ്ത പെൺകുട്ടി കൂവിയവരോട് ദേഷ്യപ്പെട്ടു. പിന്നാലെ പരസ്പരം കലഹിച്ച കുട്ടികളെ അധ്യാപകർ പിടിച്ചുമാറ്റി രംഗം ശാന്തമാക്കുകയായിരുന്നു. ഇതിനു പിന്നാലെയായിരുന്നു ട്യൂഷൻ സെന്ററിന്റെ പുറത്തു വച്ചുള്ള കയ്യാങ്കളി.
സംഘർഷത്തിനുശേഷം, ഷഹബാസിനെ സുഹൃത്തുക്കൾ വീട്ടിൽ കൊണ്ടു വിട്ടതായി റിപ്പോർട്ടുണ്ട്. പുറമേ പരിക്കുകളൊന്നുമില്ലായിരുന്നുവെങ്കിലും വൈകുന്നേരം 7 മണിയോടെ, ഛർദ്ദിക്കുകയും ബോധം നഷ്ടപ്പെടുകയും ചെയ്തു. ഉടൻ തന്നെ ഷഹബാസിനെ താമരശ്ശേരി താലൂക്ക് ആശുപത്രിയിലേക്ക് കൊണ്ടുപോയി, അവിടെ നിന്ന് മെഡിക്കൽ കോളേജിലേക്ക് മാറ്റി.ഇടിവള, നഞ്ചക് തുടങ്ങിയ ആയുധങ്ങള്‍ വിദ്യാര്‍ഥികള്‍ ഉപയോഗിച്ചെന്ന് പൊലീസ് ഇന്നലെ വെളിപ്പെടുത്തിയിരുന്നു.
