ന്യൂഡൽഹി : ബ്രിക്സ് ഉച്ചകോടിക്ക് മുന്നോടിയായി ഡൽഹിയിൽ സുരക്ഷാ ക്രമീകരണങ്ങൾ ശക്തമാക്കി . റഷ്യൻ പ്രസിഡന്റ് വ്ളാഡിമിർ പുടിന് നാല് തലങ്ങളിലുള്ള സുരക്ഷാ വലയവും ചൈനീസ് പ്രസിഡന്റ് ഷീ ജിൻപിങ്ങിന് പ്രത്യേക സുരക്ഷാ ക്രമീകരണങ്ങളും ഏർപ്പെടുത്തിയിട്ടുണ്ട്. ഇരു നേതാക്കളും 11, 12 തീയതികളിൽ ഡൽഹിയിലെത്തുമെന്നാണ് സൂചന. അവർ താമസിക്കുന്ന ഹോട്ടലുകളിലും യാത്രാപാതകളിലും കനത്ത സുരക്ഷാ സംവിധാനങ്ങളാണ് ഒരുക്കിയിരിക്കുന്നത്.
റഷ്യൻ പ്രസിഡന്റ് വ്ളാഡിമിർ പുടിൻ മൗര്യ ഹോട്ടലിലാണ് താമസിക്കുന്നത് . ശക്തമായ സുരക്ഷാ വലയം ഇവിടെ ഒരുക്കിയിട്ടുണ്ട്. മുതിർന്ന ഡൽഹി പോലീസ് ഉദ്യോഗസ്ഥർ ഉൾപ്പെടുന്നതാണ് ആഭ്യന്തര സുരക്ഷാ വലയം.മധ്യവലയത്തിൽ ഡൽഹി പോലീസ് കമാൻഡോകളും അർദ്ധസൈനിക വിഭാഗത്തിലെ ഉദ്യോഗസ്ഥരും ഉൾപ്പെടും.
ഏറ്റവും പുറമെയുള്ള വലയത്തിന്റെ ചുമതല പ്രാദേശിക പോലീസിനായിരിക്കും. ഹോട്ടലിന് പുറത്തും പരിസരപ്രദേശങ്ങളിലും പ്രാദേശിക പോലീസിനെ വിപുലമായി വിന്യസിക്കും. പ്രസിഡന്റ് പുടിനൊപ്പം എല്ലായ്പ്പോഴും അദ്ദേഹത്തിന്റെ സ്വന്തം സുരക്ഷാ സംഘവും ഉണ്ടാകും. പുടിന്റെ യാത്രകളിലും മറ്റും 25 മുതൽ 30 വരെ കമാൻഡോകളും സുരക്ഷാ ഉദ്യോഗസ്ഥരും അദ്ദേഹത്തെ അനുഗമിക്കുകയും സുരക്ഷാ വലയം തീർക്കുകയും ചെയ്യും.
വിദേശ രാഷ്ട്രത്തലവന്മാർ താമസിക്കുന്ന ഹോട്ടലുകളിലെ സുരക്ഷാ ചുമതല മുതിർന്ന ഉദ്യോഗസ്ഥരെ ഏൽപ്പിച്ചിട്ടുണ്ട്.ബ്രിക്സ് ഉച്ചകോടിയിൽ പങ്കെടുക്കുന്ന രാഷ്ട്രത്തലവന്മാർ താമസിക്കുന്ന ഹോട്ടലുകളിൽ വിപുലമായ സുരക്ഷാ ക്രമീകരണങ്ങൾ ഏർപ്പെടുത്തിയിട്ടുണ്ട്.ഈ ഹോട്ടലുകളിലെ മൊത്തത്തിലുള്ള സുരക്ഷാ മേൽനോട്ടം ‘സ്പെഷ്യൽ സിപി (ക്രൈം)’ റാങ്കിലുള്ള മുതിർന്ന ഉദ്യോഗസ്ഥർ നിർവഹിക്കും.
ഭാരത് മണ്ഡപത്തിലെ ഡൽഹി പോലീസിന്റെ സുരക്ഷാ ക്രമീകരണങ്ങൾക്ക് ‘സ്പെഷ്യൽ സിപി (സ്പെഷ്യൽ സെൽ)’ നേതൃത്വം നൽകും. ഡൽഹി പോലീസ്, കമാൻഡോകൾ, അർദ്ധസൈനിക വിഭാഗം എന്നിവരെ വിന്യസിക്കുന്നതിനൊപ്പം, ഹോട്ടലുകളിലേക്കും തിരിച്ചുമുള്ള പാതകളിലും പ്രത്യേക നിരീക്ഷണം ഏർപ്പെടുത്തും.
സുരക്ഷാ ക്രമീകരണങ്ങൾ കാര്യക്ഷമമായി കൈകാര്യം ചെയ്യുന്നതിനായി ഡൽഹിയെ വിവിധ മേഖലകളായി തിരിച്ചിട്ടുണ്ട്. ഓരോ മേഖലയുടെയും ചുമതല ഡിസിപിയ്ക്കും അഡീഷണൽ ഡിസിപി റാങ്കിലുള്ള ഉദ്യോഗസ്ഥനുമാണ്.
റഷ്യൻ പ്രസിഡന്റ് വ്ളാഡിമിർ പുടിൻ സെപ്റ്റംബർ 11-ന് ഡൽഹിയിലെത്തുമെന്ന് പ്രതീക്ഷിക്കുന്നു. ചൈനീസ് പ്രസിഡന്റ് ഷീ ജിൻപിങ് സെപ്റ്റംബർ 12-ന് ഡൽഹിയിലെത്തുമെന്നും പ്രതീക്ഷിക്കുന്നുണ്ട്. പാലം എയർഫോഴ്സ് സ്റ്റേഷനിൽ ഇറങ്ങിയ ശേഷം, ഇരു രാഷ്ട്രത്തലവന്മാരും മൗര്യ, താജ് ഹോട്ടലുകളിലേക്ക് യാത്ര ചെയ്യും.
ഇരുരാജ്യങ്ങളിൽ നിന്നുമുള്ള പ്രത്യേക സുരക്ഷാ സംഘങ്ങൾ ഇതിനകം ഡൽഹിയിലെത്തിക്കഴിഞ്ഞു . ഇവർ അതത് ഹോട്ടലുകളിലെ സുരക്ഷാ ക്രമീകരണങ്ങൾ കൈകാര്യം ചെയ്യുന്നുണ്ട്. വിദേശ സുരക്ഷാ സംഘങ്ങളുടെ കൈവശം അത്യാധുനിക ആയുധങ്ങളും സുരക്ഷാ ഉപകരണങ്ങളുമുണ്ട്.
രാഷ്ട്രത്തലവന്മാർ താമസിക്കുന്ന നിലകൾ മുതൽ ഹോട്ടലിന്റെ മുകൾത്തട്ടും താഴത്തെ നിലയും വരെ സുരക്ഷാ ഉദ്യോഗസ്ഥരെ വിന്യസിച്ചിട്ടുണ്ട്. ചൈനീസ് പ്രസിഡന്റിന്റെ സുരക്ഷാ ചുമതല ഡൽഹി പോലീസ് സ്പെഷ്യൽ സെല്ലിനാണ് നൽകിയിരിക്കുന്നത്. റഷ്യൻ പ്രസിഡന്റ് താമസിക്കാൻ സാധ്യതയുള്ള ഹോട്ടലിൽ, വിവിധ ഷിഫ്റ്റുകളിലായി ഒരു അഡീഷണൽ ഡിസിപിയെയും രണ്ട് എസിപിമാരെയും വിന്യസിച്ചിട്ടുണ്ട്.
ബന്ധപ്പെട്ട ഹോട്ടലുകളിലെ ഓരോ ജീവനക്കാരെയും സുരക്ഷാ ഏജൻസികൾ പരിശോധിച്ചുറപ്പുവരുത്തിയിട്ടുണ്ട്. ഡൽഹിയിലെ രേഖകൾ പരിശോധിക്കുന്നതിനൊപ്പം, ജീവനക്കാരുടെ സ്വന്തം സംസ്ഥാനങ്ങളിലും അവരുടെ പശ്ചാത്തലം പരിശോധിച്ചിട്ടുണ്ട്.
പുടിന്റെയും ഷീ ജിൻപിങ്ങിന്റെയും വാഹനവ്യൂഹങ്ങളായിരിക്കും ഏറ്റവും വലുതെന്നാണ് റിപ്പോർട്ടുകൾ. ഭാരത് മണ്ഡപത്തിലേക്കും തിരിച്ചും യാത്ര ചെയ്യുന്ന വിദേശ അതിഥികൾക്കുള്ള യാത്രാപാതകൾ ഡൽഹി ട്രാഫിക് പോലീസ് അന്തിമമാക്കിയിട്ടുണ്ട്. സുരക്ഷാ ക്രമീകരണങ്ങൾ വിലയിരുത്തുന്നതിനായി നിരവധി തവണ റൂട്ട് റിഹേഴ്സലുകൾ നടത്തിക്കഴിഞ്ഞു.
വിമാനത്താവളത്തിൽ നിന്ന് ഹോട്ടലുകളിലേക്കും, അവിടെ നിന്ന് ഭാരത് മണ്ഡപത്തിലേക്കുമുള്ള മുഴുവൻ പാതയിലും സുരക്ഷാ-ഗതാഗത ക്രമീകരണങ്ങൾ അതീവ ജാഗ്രതയോടെയാണ് ഒരുക്കിയിരിക്കുന്നത്.
