തിരുവനന്തപുരം: ഹൈക്കോടതിയിലെ ദേവസ്വം ബോർഡുകളുടെ പ്രത്യേക ഗവൺമെന്റ് പ്ലീഡറായി നിയമിതനായ അഡ്വ. കെ.ബി. പ്രദീപ് രാജിവച്ചു. മുഖ്യമന്ത്രി വിഡി സതീശന്റെ നിർദേശത്തെ തുടർന്നാണ് രാജി. നിയമനം വിവാദമായതിനെ തുടർന്നാണ് നടപടി. ശബരിമല സ്വർണ്ണ മോഷണക്കേസിൽ പ്രതിയായ സ്മാർട്ട് ക്രിയേഷൻസിന് വേണ്ടി ഹൈക്കോടതിയിൽ ഹാജരായത് പ്രദീപായിരുന്നു.
പ്രദീപിനെ സർക്കാർ പ്ലീഡറായി നിയമിച്ചതിൽ എസ്.ഐ.ടി ആശങ്ക പ്രകടിപ്പിച്ചിരുന്നു. അന്വേഷണത്തിന്റെ വിശദാംശങ്ങൾ ചോരുമെന്ന് ഉദ്യോഗസ്ഥർ ആശങ്ക പ്രകടിപ്പിക്കുകയും ചെയ്തു . ഇതുസംബന്ധിച്ച് എസ്.ഐ.ടി ശബരിമല സ്പെഷ്യൽ കമ്മീഷണറെയും സമീപിച്ചിരുന്നു. സ്പെഷ്യൽ കമ്മീഷണർ ഹൈക്കോടതിയെ ഇക്കാര്യം അറിയിക്കാൻ ഒരുങ്ങുമ്പോഴാണ് മുഖ്യമന്ത്രിയുടെ ഇടപെടൽ. ഹൈക്കോടതിയിലെ ദേവസ്വങ്ങളുമായി ബന്ധപ്പെട്ട കേസുകളിലാണ് പ്രദീപ് പ്രധാനമായും ഹാജരായത്.
മുൻകാല അനുഭവങ്ങളുടെ അടിസ്ഥാനത്തിലാണ് പ്ലീഡർമാർക്ക് ചുമതലകൾ നൽകുന്നത്. സ്വർണ്ണ മോഷണ കേസിന്റെ പ്രാരംഭ ഘട്ടത്തിൽ, പങ്കജ് ഭണ്ഡാരിക്കും സ്മാർട്ട് ക്രിയേഷൻസിനും വേണ്ടി മാധ്യമങ്ങളോട് സംസാരിച്ചത് കെ.ബി. പ്രദീപായിരുന്നു. 2019-ൽ ദ്വാരപാലക വിഗ്രഹങ്ങളിൽ സ്വർണം പൂശിയ സ്മാർട്ട് ക്രിയേഷൻസിന്റെ ഉടമയും സിഇഒയുമായ പങ്കജ് ഭണ്ഡാരി കേസിൽ ഒമ്പതാം പ്രതിയാണ്.
പ്രതിക്കുവേണ്ടി വാദിച്ച അഭിഭാഷകനെ സർക്കാർ അഭിഭാഷകനാക്കുന്നത് ശരിയാണോ എന്ന് മാധ്യമങ്ങൾ ചോദിച്ചപ്പോൾ, പ്രതിയുടെ ബലഹീനതകൾ അറിയുന്ന ഒരാൾ സർക്കാർ അഭിഭാഷകനായത് നല്ല കാര്യമാണെന്നായിരുന്നു ദേവസ്വം മന്ത്രി കെ മുരളീധരൻ പ്രതികരിച്ചത് . കഴിഞ്ഞ മന്ത്രിസഭാ യോഗത്തിൽ താൻ പങ്കെടുത്തില്ലെന്നും സർക്കാർ അഭിഭാഷകനെ നിയമിക്കാനുള്ള വിവേചനാധികാരം മുഖ്യമന്ത്രിക്ക് നൽകിയിരുന്നുവെന്നും മന്ത്രി പറഞ്ഞു. സ്വർണ്ണ മോഷണക്കേസിലെ പ്രതി രക്ഷപ്പെടില്ല. മന്ത്രിസഭ എടുത്ത തീരുമാനം മന്ത്രിക്ക് തള്ളിക്കളയാൻ കഴിയില്ല. മന്ത്രിസഭയുടെ കൂട്ടുത്തരവാദിത്തമാണിതെന്നും കെ മുരളീധരൻ പറഞ്ഞു.
ഇതുവരെ ദേവസ്വം വകുപ്പിന് സീനിയർ ഗവൺമെന്റ് പ്ലീഡർ സ്ഥാനം മാത്രമേ ഉണ്ടായിരുന്നുള്ളൂ. പി കെ സജീവൻ, പി കെ ശാന്തമ്മ എന്നിവരെ പ്രത്യേക ഗവൺമെന്റ് പ്ലീഡർമാരായും നിയമിച്ചിട്ടുണ്ട്. മുൻ സർക്കാർ നിയമിച്ച 18 സീനിയർ ഗവൺമെന്റ് പ്ലീഡർമാരെയും 20 ഗവൺമെന്റ് പ്ലീഡർമാരെയും പിരിച്ചുവിട്ട ശേഷമാണ് പുതിയ നിയമനം നടത്തിയത്. മൂന്ന് സ്പെഷ്യൽ ഗവൺമെന്റ് പ്ലീഡർമാർക്ക് പുറമേ, 17 സീനിയർ ഗവൺമെന്റ് പ്ലീഡർമാരെയും 19 ഗവൺമെന്റ് പ്ലീഡർമാരെയും നിയമിച്ചിട്ടുണ്ട്. സ്പെഷ്യൽ പ്ലീഡർമാരുടെ കാലാവധി മൂന്ന് വർഷമാണ്.
