തൃശൂർ: തൃശൂർ പൂരത്തിനായുള്ള പടക്കങ്ങൾ തയ്യാറാക്കിക്കൊണ്ടിരുന്ന മുണ്ടത്തിക്കോട് പടക്ക നിർമ്മാണ സ്ഥലത്ത് വൻ സ്ഫോടനം . 8 പേർ മരിച്ചതായി സ്ഥിരീകരിച്ചിട്ടുണ്ട്. പ്രാഥമിക റിപ്പോർട്ടുകൾ പ്രകാരം 40 ഓളം പേർക്ക് പരിക്കേറ്റു.
തിരുവമ്പാടി ദേവസ്വം ബോർഡിന് പടക്കങ്ങൾ വിതരണം ചെയ്യുന്ന ലൈസൻസുള്ള നിർമ്മാതാവായ മുണ്ടത്തിക്കോട് സതീഷിന്റെ ഉടമസ്ഥതയിലുള്ള പടക്ക ഷെഡിലാണ് സംഭവം നടന്നത്.സതീഷും ഗുരുതരമായി പരിക്കേറ്റവരിൽ ഉൾപ്പെടുന്നു. പരിക്കേറ്റവരെ തൃശൂർ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. നാല് പേരുടെ നില ഗുരുതരമാണ്.
ആദ്യം രണ്ട് വലിയ സ്ഫോടനങ്ങൾ കേട്ടുവെന്നും തുടർന്ന് സ്ഥലത്ത് സൂക്ഷിച്ചിരുന്ന പടക്കങ്ങൾ പൊട്ടിത്തെറിച്ചതിനാൽ തുടർച്ചയായ സ്ഫോടനങ്ങൾ ഉണ്ടായെന്നുമാണ് ദൃക്സാക്ഷികൾ പറയുന്നത്. സ്ഫോടനങ്ങളുടെ ശബ്ദം കിലോമീറ്ററുകൾ അകലെ വരെ കേൾക്കാമായിരുന്നുവെന്ന് നാട്ടുകാർ പറഞ്ഞു.ഇടുങ്ങിയ റോഡായതിനാൽ അഗ്നിശമന സേനാംഗങ്ങൾക്ക് സ്ഥലത്തെത്താൻ ബുദ്ധിമുട്ടായിരുന്നു. സമീപത്തെ മതിൽ തകർത്താണ് അഗ്നിശമന ജീവനക്കാർക്ക് ഷെഡിലേക്ക് എത്താൻ കഴിഞ്ഞത്.പരിക്കേറ്റവർക്ക് പ്രത്യേക ചികിത്സ ഉറപ്പാക്കാനും തൃശൂർ ഗവൺമെന്റ് മെഡിക്കൽ കോളേജിൽ ആവശ്യമായ ക്രമീകരണങ്ങൾ ചെയ്യാനും സംസ്ഥാന ആരോഗ്യ മന്ത്രി വീണ ജോർജ് ഉദ്യോഗസ്ഥരോട് നിർദ്ദേശിച്ചു.
അടിയന്തര സേവനത്തിനായി കനിവ് കൂടുതൽ ആംബുലൻസുകൾ സ്ഥലത്ത് വിന്യസിക്കണമെന്നും മന്ത്രി നിർദേശിച്ചു.പടക്ക നിർമ്മാണ യൂണിറ്റിൽ ഉണ്ടായ അപകടത്തെക്കുറിച്ച് ജില്ലാ കളക്ടർ ശിഖ സുരേന്ദ്രൻ മജിസ്റ്റീരിയൽ തല അന്വേഷണത്തിന് ഉത്തരവിട്ടു. അപകടത്തിന്റെ കാരണവും അതിന്റെ അനന്തരഫലങ്ങളും സംബന്ധിച്ച് വിശദമായ അന്വേഷണം നടത്താൻ തൃശൂർ ആർഡിഒ സബ് ഡിവിഷണൽ മജിസ്ട്രേറ്റിനെ ചുമതലപ്പെടുത്തി.
