കോഴിക്കോട്: തിങ്കളാഴ്ച സംസ്ഥാനത്ത് മൂന്ന് പേർക്ക് കൂടി പാമ്പുകടിയേറ്റു. കോഴിക്കോട് പേരാമ്പ്രയിലെ കണ്ണിപ്പൊയിൽ ചിത്രാഞ്ജലിയിൽ ശിവദാസന്റെ മകൾ അഞ്ജലി (36), താമരശ്ശേരി പൂനൂർ സ്വദേശി മുഹമ്മദ് അൻസാർ (22), തിരുവനന്തപുരം പെരുങ്ങുഴി സ്വദേശി ഭുവന ചന്ദ്രൻ എന്നിവർക്കാണ് പാമ്പുകടിയേറ്റത്. അഞ്ജലിയെ ശംഖുവരയൻ ആണ് കടിച്ചത്. പേരാമ്പ്ര താലൂക്ക് ആശുപത്രിയിൽ ചികിത്സ തേടി. പിന്നീട് മെച്ചപ്പെട്ട ചികിത്സയ്ക്കായി കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി.
പിന്നീട് വീട്ടിലെ ടോയ്ലറ്റിൽ നിന്ന് പാമ്പിനെ പിടികൂടി. ഭുവന ചന്ദ്രൻ ഇപ്പോൾ തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലാണ്. അൻസറിനെ ഇന്ന് രാവിലെയാണ് പാമ്പ് കടിച്ചത്. കിടക്കയിൽ പാമ്പിനെ കണ്ട് പരിശോധിച്ചപ്പോഴാണ് കടിയേറ്റ പാടുകൾ ശ്രദ്ധയിൽപ്പെട്ടത്. മെഡിക്കൽ കോളേജ് ആശുപത്രിയിൽ ചികിത്സയിലാണ് അൻസർ . അതേസമയം, കോഴിക്കോട് കുറ്റിയാടിയിൽ ഒരു വീട്ടിൽ അഞ്ച് വിഷപ്പാമ്പുകളെ കണ്ടെത്തി.
കുറ്റിയാടിയിലെ കപ്പുമ്മൽ രമേശിന്റെ വീട്ടിലാണ് സംഭവം. ശംഖുവരയൻ ഇനത്തിൽപ്പെട്ട പാമ്പുകളായിരുന്നു അവ. വീട്ടിലെ വിവിധ മുറികളിൽ നിന്നാണ് ഇവയെ കണ്ടെത്തിയത്. കുട്ടികൾ ഉറങ്ങിയിരുന്ന കിടക്കയിൽ നിന്നാണ് കുടുംബം ആദ്യം പാമ്പിനെ കണ്ടെത്തിയത്. കിടക്കയുടെ തലയിണയുടെ വശത്താണ് പാമ്പ് ഉണ്ടായിരുന്നത്. ഇതിനുശേഷം, അടുത്ത മുറിയിൽ വീണ്ടും പാമ്പിനെ കണ്ടെത്തി. ശുചിമുറിയിൽ കയറിയപ്പോൾ ശംഖുവരയൻ ഇനത്തിൽപ്പെട്ട ഒരു പാമ്പിനെ കണ്ടെത്തി. ഇതോടെ അയൽക്കാരുടെ സഹായത്തോടെ വീട് തിരഞ്ഞു. ആകെ അഞ്ച് പാമ്പുകളെ കണ്ടെത്തി. പെയിന്റ് ചെയ്ത ചുവരുകളും മനോഹരമായി ടൈൽ ചെയ്ത തറയും ഉള്ള വീട്ടിൽ നിന്ന് പാമ്പുകളെ കണ്ടെത്തിയത് നാട്ടുകാരെ ആശങ്കയിലാക്കി.
