വാഷിംഗ്ടൺ : വൈറ്റ് ഹൗസ് സന്ദർശിക്കാൻ ചൈനീസ് പ്രസിഡന്റ് ഷി ജിൻപിങ്ങിനെ ക്ഷണിച്ച് യുഎസ് പ്രസിഡന്റ് ഡൊണാൾഡ് ട്രംപ് . ഷി ജിൻപിങ്ങുമായുള്ള തന്റെ ചർച്ചകൾ വളരെ പോസിറ്റീവായിരുന്നുവെന്നും , ചൈന ഇറാനെ ആയുധമാക്കില്ലെന്നും, സൈനിക ഉപകരണങ്ങൾ നൽകില്ലെന്നും ഉറപ്പ് നൽകിയതായും ഡൊണാൾഡ് ട്രംപ് പറഞ്ഞു.
യുഎസും ചൈനയും ഉഭയകക്ഷി ബന്ധത്തിന് പുതിയൊരു നയം അംഗീകരിച്ചതായി പ്രസിഡന്റ് ഷി ജിൻപിംഗ് പറഞ്ഞു. അടുത്ത മൂന്ന് വർഷത്തേക്ക് ഇരു രാജ്യങ്ങളും തമ്മിലുള്ള തന്ത്രപരമായ ബന്ധത്തിന് ഈ നയം വഴികാട്ടുമെന്നും അദ്ദേഹം പറഞ്ഞു. ഹോർമുസ് കടലിടുക്കിനെക്കുറിച്ചുള്ള ആശങ്കകൾ ഇരു രാജ്യങ്ങളും പങ്കുവെച്ചു. ആഗോള ഊർജ്ജ വിതരണത്തിനും സമുദ്ര വ്യാപാരത്തിനും ഈ പാത തുറന്നിടുന്നത് നിർണായകമാണെന്നും ഇരു രാജ്യങ്ങളും പ്രസ്താവിച്ചു. ഹോർമുസിന്റെ സൈനികവൽക്കരണത്തെയും അതിൽ ഏതെങ്കിലും തരത്തിൽ ടോളുകൾ ചുമത്തുന്നതിനെയും ഷി ജിൻപിംഗ് എതിർക്കുന്നുമുണ്ട് .
യുഎസ്-ചൈന ബന്ധങ്ങൾ സന്തുലിതമാക്കുന്നതിനും ആഗോള വിഷയങ്ങളിൽ സഹകരണം വർദ്ധിപ്പിക്കുന്നതിനുമുള്ള പ്രധാന ചുവടുവയ്പ്പായാണ് ഈ കൂടിക്കാഴ്ച കണക്കാക്കപ്പെടുന്നത്. അതേസമയം ഹോർമുസ് കടലിടുക്ക് വീണ്ടും തുറക്കുന്നത് ചൈനയുടെ താൽപ്പര്യത്തിന് വേണ്ടിയാണെന്ന് യുഎസ് ട്രഷറി സെക്രട്ടറി സ്കോട്ട് ബെസന്റ് വ്യാഴാഴ്ച പറഞ്ഞു. “അവർ സാധ്യമായതെല്ലാം ചെയ്യുമെന്ന് ഞാൻ കരുതുന്നു. കടലിടുക്ക് വീണ്ടും തുറക്കുന്നത് ചൈനയുടെ താൽപ്പര്യമാണ്,” ബെസന്റ് പറഞ്ഞു.
ഡൊണാൾഡ് ട്രംപും ചൈനീസ് പ്രസിഡന്റ് ഷി ജിൻപിങ്ങുമായുള്ള കൂടിക്കാഴ്ചയ്ക്ക് ശേഷവും തായ്വാനോടുള്ള അമേരിക്കൻ നയത്തിൽ മാറ്റമുണ്ടാകില്ലെന്ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോ പറഞ്ഞിരുന്നു . ചൈന ചർച്ചകളിൽ പതിവായി തായ്വാൻ വിഷയം ഉന്നയിക്കാറുണ്ടെന്നും സ്വയംഭരണ ദ്വീപിനെച്ചൊല്ലിയുള്ള അഭിപ്രായവ്യത്യാസങ്ങൾ സംഘർഷത്തിലേക്ക് നയിച്ചേക്കാമെന്ന ഷിയുടെ മുന്നറിയിപ്പ് പതിവാണെന്നും റൂബിയോ പറഞ്ഞു.
