തിരുവനന്തപുരം : ഏഴാം തരം തുല്യതാ പരീക്ഷ പാസായി ചലച്ചിത്ര താരം ഇന്ദ്രൻസ്. 500ൽ 297 മാർക്ക് നേടിയാണ് താരത്തിന്റെ വിജയം. 68-)0 വയസിലാണ് ഇന്ദ്രൻസ് തുല്യതാ പരീക്ഷ എഴുതിയത് . തിരുവനന്തപുരം അട്ടക്കുളങ്ങര സെൻട്രൽ സ്‌കൂളിലായിരുന്നു പരീക്ഷ . പരീക്ഷഫലം എത്തിയപ്പോൾ വയനാട്ടിൽ ഷൂട്ടിംഗിന്റെ തിരക്കിലായിരുന്നു താരം .
കേരള സംസ്ഥാന സാക്ഷരതാ മിഷൻ അതോറിറ്റി നടപ്പാക്കുന്ന നാലാം തരം തുല്യതാ കോഴ്‌സിന്റെയും ഏഴാം തരം തുല്യതാ കോഴ്‌സിന്റെയും പരീക്ഷാഫലമാണ് ഇന്ന് പ്രഖ്യാപിച്ചത്. നാലാം തരം തുല്യതാകോഴ്‌സിൽ 487 പരീക്ഷയെഴുതിയതിൽ 476 പേർ വിജയിച്ചു. 1483 പേരാണ് വിജയിച്ചത്.
കുട്ടിക്കാലത്ത് കുടുംബപ്രാരാബ്ധങ്ങൾ മൂലം നാലാം ക്ലാസിൽ പഠനം ഉപേക്ഷിച്ച ഇന്ദ്രൻസ് പിന്നീട് തയ്യൽ കടയിൽ ജോലി തുടങ്ങുകയായിരുന്നു. തുടർന്ന് സിനിമയിലെത്തിയെങ്കിലും പഠനം പൂർത്തിയാക്കണമെന്ന മോഹം മനസിലുണ്ടായിരുന്നു. ഇതോടെയാണ് തുല്യതാ പരീക്ഷ എഴുതാൻ തീരുമാനിച്ചത് . പത്താംക്ലാസ് തുല്യത നേടുക എന്നതാണ് ഇന്ദ്രൻസിന്റെ അടുത്ത ലക്ഷ്യം. നടനെ അഭിനന്ദിച്ച് വിദ്യാഭ്യാസ മന്ത്രി വി ശിവൻ കുട്ടി ഫേസ്ബുക്കിൽ ചിത്രവും പങ്ക് വച്ചിട്ടുണ്ട്.
