കൊച്ചി: മുൻകൂർ നോട്ടീസ് നൽകാതെ 800 ഓളം ജീവനക്കാരെ കൂട്ടത്തോടെ പിരിച്ചുവിട്ട യുഎസ് ആസ്ഥാനമായുള്ള മെഡിക്കൽ കോഡിംഗ് കമ്പനിയായ കൊറോഹെൽത്തിൽ പ്രതിഷേധം തുടരുന്നു. സർക്കാരിന്റെ ആവശ്യം നിരസിച്ച കമ്പനി ഇന്നും ജീവനക്കാരെ ഓഫീസിലേക്ക് പ്രവേശിപ്പിച്ചില്ല. കമ്പനിയുമായി ബന്ധപ്പെട്ട ആരും പാലാരിവട്ടം ഓഫീസിൽ എത്തിയിട്ടില്ല. വരാനിരിക്കുന്ന കമ്പനി ഉദ്യോഗസ്ഥർ പങ്കെടുക്കുമോ എന്നും സംശയമുണ്ട്.
നേരത്തെ, ലേബർ ഓഫീസർ നടത്തിയ ചർച്ചയിൽ, 10 ന് നടക്കാനിരിക്കുന്ന മന്ത്രിതല ചർച്ച വരെ തുടർനടപടികൾ സ്വീകരിക്കരുതെന്ന് കമ്പനിയുടെ നിയമ ഉപദേഷ്ടാവിന് കർശന നിർദ്ദേശം നൽകിയിരുന്നു. ഇതുസംബന്ധിച്ച് കമ്പനിയിൽ നോട്ടീസ് പതിക്കാൻ ലേബർ ഓഫീസർ ഉത്തരവിട്ടിരുന്നു. ചർച്ച നടക്കുന്നതുവരെ ജീവനക്കാരെ ഓഫീസിൽ പ്രവേശിക്കാൻ അനുവദിക്കണമെന്നും തൊഴിൽ വകുപ്പ് നിർദ്ദേശിച്ചിരുന്നു.
കമ്പനിയെ ഇക്കാര്യം അറിയിക്കുമെന്ന് നിയമ ഉപദേഷ്ടാവ് പറഞ്ഞിരുന്നു. മാത്രമല്ല ജീവനക്കാർക്ക് ജോലി നൽകാനാകില്ലെന്നും, ഓഫീസിൽ പ്രവേശിക്കാമെന്നും അറിയിച്ചിരുന്നു . എന്നാൽ ഇന്ന് ഓഫീസിലെത്തിയ ജീവനക്കാർ ഓഫീസ് പൂട്ടിയിരിക്കുന്നതാണ് കണ്ടത്. കമ്പനിയിൽ നിന്ന് ഒരു അറിയിപ്പും ലഭിച്ചിട്ടില്ലെന്ന് കൊറോഹെൽത്ത് പ്രവർത്തിക്കുന്ന കോ-വർക്കിംഗ് സ്പെയ്സിലെ സുരക്ഷാ ഉദ്യോഗസ്ഥർ പറഞ്ഞു. ഇന്നലെ രാവിലെ, മുൻ ജീവനക്കാരെ ഓഫീസിലേക്ക് പ്രവേശിക്കുന്നത് തടയാൻ മാനേജ്മെന്റ് ഗേറ്റ് പൂട്ടിയിരുന്നു . ഇതോടെ, ഡിവൈഎഫ്ഐ പ്രവർത്തകർ സ്ഥലത്തെത്തി ബലമായി വാതിൽ തുറന്ന് ജീവനക്കാരെ അകത്തേക്ക് കടത്തിവിട്ടു.
