ശബരിമല ; മണ്ഡലകാലത്തെ ചരിത്രം തിരുത്തിയെഴുതിയ ദിവസമായിരുന്നു ഇന്നലെ.96,007 പേരാണ് കഴിഞ്ഞ ദിവസം ശബരിമലയിലെത്തിയത് . ഈ മണ്ഡലകാലത്ത് ഏറ്റവും അധികം തീർത്ഥാടകർ ദർശനത്തിന് എത്തിയത് ഇന്നലെയാണ്. സ്‌പോട് ബുക്കിങ് വഴി മാത്രം എത്തിയത് 22,121 പേരാണ്.
തീർത്ഥാടകരുടെ എണ്ണം വർദ്ധിച്ചുവെങ്കിലും മുൻ വർഷത്തേത് പോലെ തീർത്ഥാടകരെ വഴിയിൽ തടയുകയോ മറ്റ് നിയന്ത്രണങ്ങൾ ഏർപ്പെടുത്തുകയോ ചെയ്തിട്ടില്ല. 18 ന് രാത്രി മലകയറി എത്തിയവരിൽ ദർശനം കിട്ടാതെ പതിനെട്ടാംപടി കയറിയ 5000ത്തോളം പേർ ഇന്നലെ പുലർച്ചെ വടക്കേ നടയിലൂടെ ദർശനം നടത്തി.
പൊലീസ് ഉണർന്നു പ്രവർത്തിച്ചതാണ് പരാതിക്ക് ഇടയില്ലാതെ ദർശനം സുഗമമാക്കിയതെന്നാണ് വിലയിരുത്തൽ. ഇന്നും തിരക്ക് അതുപോലെ തുടരുകയാണ്. രാവിലെ പതിനെട്ടാംപടി കയറാനുള്ള ക്യൂ മരക്കൂട്ടം വരെ എത്തിയിട്ടുണ്ട്. മണ്ഡലപൂജയ്ക്ക് ഇനി ഒരാഴ്ച മാത്രമാണ് ബാക്കി നിൽക്കെ വരും ദിവസങ്ങളിലും തിരക്ക് വർദ്ധിക്കുമെന്നാണ് വിലയിരുത്തൽ.
