ടെൽ അവീവ് : ഹമാസ് കേന്ദ്രങ്ങളിൽ ഇസ്രായേൽ വ്യോമാക്രമണം . 300 ഓളം പേർ കൊല്ലപ്പെട്ടു . ജനുവരി 19 ന് വെടിനിർത്തൽ ആരംഭിച്ചതിനുശേഷം നടന്ന ഏറ്റവും വലിയ ആക്രമണമാണിത്.വ്യോമാക്രമണങ്ങളിൽ “കൂടുതലും കുട്ടികളും സ്ത്രീകളും പ്രായമായവരും” കൊല്ലപ്പെട്ടുവെന്നും 150 ഓളം പേർക്ക് പരിക്കേറ്റുവെന്നും ഗാസയുടെ സിവിൽ ഡിഫൻസ് ഏജൻസി അറിയിച്ചു.
വടക്കൻ ഗാസ, ഗാസ സിറ്റി, മധ്യ, തെക്കൻ ഗാസ സ്ട്രിപ്പിലെ ദെയ്ർ അൽ-ബലാഹ്, ഖാൻ യൂനിസ്, റഫ എന്നിവയുൾപ്പെടെ നിരവധി സ്ഥലങ്ങളിൽ സ്ഫോടനമുണ്ടായി. ഗാസ സ്ട്രിപ്പിലെ ഹമാസ് തലവനായ മഹ്മൂദ് അബു വത്ഫയും ഗാസ സിറ്റിയിൽ നടന്ന ആക്രമണത്തിൽ കൊല്ലപ്പെട്ടതായാണ് റിപ്പോർട്ട്.
“രാഷ്ട്രീയ തലം” അനുസരിച്ച് ഗാസ സ്ട്രിപ്പിലെ ഹമാസ് ഭീകര കേന്ദ്രങ്ങളിൽ “വിപുലമായ ആക്രമണങ്ങൾ നടത്തുകയാണെന്ന്” ഇന്ന് രാവിലെ എക്‌സിൽ ഇസ്രായേൽ പ്രതിരോധ സേന പങ്ക് വച്ച പോസ്റ്റിൽ പറയുന്നു .ഗാസയ്ക്ക് സമീപമുള്ള എല്ലാ സ്കൂളുകളും അടച്ചുപൂട്ടാൻ ഇസ്രായേൽ ഉത്തരവിട്ടു.
ബന്ദികളെ മോചിപ്പിക്കാൻ ഹമാസ് വിസമ്മതിച്ചതിനും യുഎസ് പ്രസിഡൻഷ്യൽ ദൂതൻ സ്റ്റീവ് വിറ്റ്കോഫിൽ നിന്നും മധ്യസ്ഥരിൽ നിന്നും ലഭിച്ച എല്ലാ നിർദ്ദേശങ്ങളും നിരസിച്ചതിനും” ശേഷമാണ് ആക്രമണം നടത്താൻ ഉത്തരവിട്ടതെന്ന് പ്രധാനമന്ത്രി ബെഞ്ചമിൻ നെതന്യാഹുവിന്റെ ഓഫീസ് വ്യക്തമാക്കി. എന്നാൽ യുദ്ധം പുനരാരംഭിച്ചുകൊണ്ട് ബന്ദികളെ “ബലിയർപ്പിക്കാൻ” നെതന്യാഹു തീരുമാനിച്ചതായാണ് ഹമാസ് പറഞ്ഞത്.
മറ്റൊരു പ്രസ്താവനയിൽ, കരാർ ലംഘിച്ചതിനും അട്ടിമറിച്ചതിനും മിസ്റ്റർ നെതന്യാഹുവിനെ ഹമാസ് കുറ്റപ്പെടുത്തി, വെടിനിർത്തൽ ലംഘനം “ഗാസയിലെ തടവുകാരെ അജ്ഞാതമായ ഒരു വിധിയിലേക്ക് തള്ളിവിടുന്നു” എന്നും ഹമാസ് പറഞ്ഞു.
