ന്യൂഡൽഹി: പാക് അധിനിവേശ കശ്മീരിൽ (പിഒകെ) പാകിസ്ഥാൻ സർക്കാരിനെതിരായ പ്രതിഷേധം തുടർച്ചയായ മൂന്നാം ദിവസത്തിലേക്ക് കടന്നു. സുരക്ഷാ സേനയുമായുള്ള ഏറ്റുമുട്ടലിൽ എട്ട് സാധാരണക്കാർ കൊല്ലപ്പെട്ടതായി ഏറ്റവും പുതിയ റിപ്പോർട്ടുകൾ പറയുന്നു.
ബാഗ് ജില്ലയിലെ ധീർകോട്ടിൽ നിന്നുള്ള നാല് പേരും മുസാഫറാബാദിൽ നിന്നുള്ള രണ്ട് പേരും മിർപൂരിൽ നിന്നുള്ള രണ്ട് പേരും മരിച്ചവരിൽ ഉൾപ്പെടുന്നു. ഇന്നലെ മുസാഫറാബാദിൽ രണ്ട് പേരും കൊല്ലപ്പെട്ടിരുന്നു.
അടിസ്ഥാന അവകാശങ്ങൾ സംരക്ഷിക്കണമെന്ന് ആവശ്യപ്പെട്ട് സംയുക്ത അവാമി ആക്ഷൻ കമ്മിറ്റിയുടെ നേതൃത്വത്തിലാണ് പ്രതിഷേധങ്ങൾ നടക്കുന്നത്. മുസാഫറാബാദിലെ ഒരു പാലത്തിൽ സ്ഥാപിച്ചിരിക്കുന്ന കണ്ടെയ്നറുകൾക്ക് നേരെ പ്രകടനക്കാർ കല്ലെറിയുന്നതും കണ്ടെയ്നറുകൾ നദിയിലേക്ക് തള്ളുന്നതും കാണിക്കുന്ന വീഡിയോകൾ പുറത്തുവന്നിട്ടുണ്ട്.
കഴിഞ്ഞ 72 മണിക്കൂറിനുള്ളിൽ, അശാന്തിയെ തുടർന്ന് മാർക്കറ്റുകൾ, കടകൾ, പ്രാദേശിക ബിസിനസുകൾ, ഗതാഗത സേവനങ്ങൾ എന്നിവ പൂർണ്ണമായും അടച്ചുപൂട്ടി.മുസഫറാബാദിലെ മരണങ്ങൾക്ക് കാരണം പാകിസ്ഥാൻ റേഞ്ചേഴ്സിന്റെ വെടിവയ്പ്പാണെന്നും മറ്റ് നാശനഷ്ടങ്ങൾക്ക് കാരണം സാധാരണക്കാരെ ലക്ഷ്യമിട്ട് സൈന്യം ഉൾപ്പെടെയുള്ള പാകിസ്ഥാൻ സുരക്ഷാ സേന നടത്തിയ കനത്ത ഷെല്ലാക്രമണമാണെന്നും ജെഎസി പറയുന്നു.
അടിച്ചമർത്തലുകൾക്കിടയിലും, പ്രതിഷേധക്കാർ മുസാഫറാബാദിലേക്കുള്ള അവരുടെ നീണ്ട മാർച്ച് തുടരുകയാണ് . പാകിസ്ഥാനിൽ താമസിക്കുന്ന കശ്മീരി അഭയാർത്ഥികൾക്കായി സംവരണം ചെയ്തിരിക്കുന്ന 12 പിഒകെ അസംബ്ലി സീറ്റുകൾ നിർത്തലാക്കുന്നത് ഉൾപ്പെടെ 38 ആവശ്യങ്ങൾ ജെഎഎസി മുന്നോട്ടുവച്ചിട്ടുണ്ട്.മുസാഫറാബാദിലെത്താൻ ചില പ്രതിഷേധക്കാർ ഉപരോധങ്ങൾ മറികടന്ന് എത്തിയതായും നഗരത്തിൽ വലിയ ജനക്കൂട്ടം തടിച്ചുകൂടുന്നതായുമൊക്കെയുള്ള ദൃശ്യങ്ങളും പുറത്ത് വന്നു.
പൊതുജനങ്ങളുടെ ക്ഷമ നശിച്ചുവെന്നും പണിമുടക്കിനെ ‘പ്ലാൻ എ’ മാത്രമാണെന്നും ജെഎഎസി നേതാവ് മിർ പ്രധാനമന്ത്രി ഷെഹ്ബാസ് ഷെരീഫിന് മുന്നറിയിപ്പ് നൽകി. കമ്മിറ്റിക്ക് അടിയന്തര നടപടികൾ നിലവിലുണ്ടെന്നും അദ്ദേഹം സൂചിപ്പിച്ചു.
